METROPOLITEN Suprintenden (Metsup) bilong Nesenel Kepital Distrik (NCD) Gideon Ikumu i singaut long ol lain husat i no inap long kontrolim ol yet taim ol i dring bia o ol arapela spak wara long stopim pasin bilong dring bia bikos em i tok ol i bai bringim birua long ol yet, ol famili na pren bilong ol, traib na komyuniti tu.

“Ol pait i wok long kamap klostu klostu long ol setelmen long Pot Mosbi i mekim na mi mekim dispela singaut,” Metsup Ikumu i tok.

“Ol i mekim bia long dring na amamas na i no long abyusim na statim kros pait we ol manmeri kisim bagarap o dai na ol gutpela propeti i bagarap. Sapos yu no inap long kontrolim yu yet orait yu stopim pasin bilong dring bia.”

Em i tok sampela mesa bai kamap long stretim ol hevi we i kamap bikos long pasin bilong dring bia.

Em i mekim dispela toktok i no long taim i go pinis bihainim wanpela pait i kamap namel long ol spak man na ol sampela lain husat i stap long Manuti Setelmen long Pot Mosbi Not Is Ilektoret.  

Ol faivpela man husat i spak na i statim dispela pait i nau stap pinis long han bilong polis. Ol i bin askim wanpela PMV bas long mani bipo long ol i brukim glas bilong bas. PMV bas i lusim dispela hap we ol spakman i brukim galas bilong en na i go na i kam bek gen wantaim planti man we i holim ol samting bilong pait. Ol dispela man i go insait long maket ples na bagarapim olgeta samting na kukim ol haus tu.

Ol manmeri long maket i ranawe i go i kam na ol manmeri husat i save stap long Manuti i bung gen na i pait wantaim ol dispela lain husat i bagarapim ol samting na kukim haus tasol ol polis i kam na i stopim pait.

NCD Metsup Ikumu i tok em i salim ol strongpela polis olsem Fox yunit 301, Fox 300, Fox 203, CID Moto Skuad, Siera Alfa 2 Charlie, na Mobail Skuad Yunit long i go kwiktaim na stopim pait.

Em i tok ol lain bilong kamapim bel isi long dispela eria na ol komyuniti lida bai bung na toktok long strongim bel isi na gutpela oda long setelmen.

Rebecca Negere i raitim