OLGETA pipel i mas kisim veksin taim em i kam long ol, bisop Donald Lippert bilong Mendi Daiosis i tok.

Bisop Lippert i tok nogat man o meri bai i pusim ol pipel long kisim veksin tasol long gutpela bilong olgeta pipel; ol famili na komyuniti, ol husat inap kisim veksin i mas kisim veksin.

“Veksin em i banis bilong ol kainkain sik,” Bisop Lippert i tok.

Em i tok planti pipel i stap gut tude na abrusim sik polio, kolera, sotwin na ol arapela sik bikos ol i bin kisim veksin.

Long dispela taim kantri i rolimaut program bilong COVID-19 veksin long daunim dispela sik nogut.

Em i tok PNG i nogat gutpela helt sistem we inap givim gutpela helt kea long ol pipel olsem na gutpela ol pipel i mas was long ol yet.

Em yet i kisim namba wan sut bilong AstraZeneca veksin las wik na inap nau i nogat wanpela hevi i kamap long em. Em I luk fowat long kisim namba tu sut.

Bisop Lippert i mekim dispela tok long taim planti tok pret i go i kam long veksin bilong COVID-19.

Rosa Koian i raitim