WANPELA buk nau i kamap long skulim ol manmeri wanem em coronavirus (COVID-19) banis sut.

Dispela buk em wanpela tisa long Yunivesiti bilong Papua Niuini (UPNG) em Profesa Glen Mola i raitim.

Mola i wanpela marasin dokta na i save wok tu long Pot Mosbi Jeneral Haus sik.

Melanesia Foundation em Melanesia Turis Sevis (MTS) long Madang i givim mani long kamapim dispela buk na Nesenel Kontrol Senta, Gavman bilong Australia na Institut ov Medikal Risets na sampela ol dokta i givim sapot bilong ol.

Ol i amamas long givim sapot tasol long wankain taim, i askim ol arapela ogenaisesen long givim sapot bilong ol olsem wok bilong mekim klia na skulim ol manmeri long kisim dispela banis sut i isi.

Ripot i no tokaut klia hamas namba bilong ol buk em ol i prinim tasol ripot i tok ol namba wan prin bilong buk i kamap pinis long Madang Provins na ol pablisa i wok long tilim na yusim long skulim ol lokal manmeri.

Namba tu prin em Ok Tedi Maining kampani i helpim wantaim mani long prinim i stap nau prin.

Sir Peter Barter, Menesing Dairekta bilong MTS i tok aninit long wei MTS i mekim ol wok, em i mas givim moa taim long promotim wok bilong turisim tasol dispela i no kamap long wanem em i tingting moa long helt bilong ol manmeri.

Em i tok maski long COVID-19, Papua Niugini i go pas yet olsem wanpela namba wan ples long Pasifik rijon we ol turis i mas kam na lukim.