MINISTA bilong Turisim, At na Kalsa, Isi Henry Leonard i amamas long wok Nesenel Kalsurel Komisin (NCC) i mekim.

Em i tokaut long dispela long taim Komisin i opim nupela Nesenel Kalsurel Komisen Akaiv Laibreri opis long Marea Haus long Waigani long dispela wik.

Em i givim luksave olsem wantaim kamap bilong nupela opis dispela bai helpim Komisin long skruim wok bilong luksave long ol kalsa na lukautim dispela ol kalsa long ol taim i kam.

“Givim luksave na lukautim kalsa bilong mipela i bikpela samting,” Leonard i tok.

“Dispela i laikim politikal sapot na komyuniti wantaim.”

Leonard i hop olsem ol gavman bilong bihain taim i mas go het long givim luksave na putim gutpela was long kalsa bilong mipela.

Long wankain taim, Ekting Ekseketiv Dairekta bilong NCC Steven Kilanda i amamas olsem Komisin nau i gat nupela haus long lukautim ol wok bilong em.

Em i tok em bin bikpela salens long Komisin long lukautim ol wok bilong em long wanem komisin yet i no gat haus bilong em yet na olsem em i bin wok long muv long wanpela haus i go long narapela haus na dispela i lukim ol wok bilong em i stap nabaut na sampela i bin lus.

Robert Yalip, Dairekta bilong Laibreri Sevis i tok strong long mekim moa wok painimaut na luksave long ol kalsurel pasin we i wok long dai bikos long pasin na tingting bilong Westen laipstail.

Don Niles, Ekting Dairekta bilong Institut bilong Papua Niugini Stadi i tok wok bilong lukautim ol bikpela tok na wok bilong kantri i bikpela samting.

Em i tok dispela ol samting i givim aidentiti na luksave long kantri na ol pipel bilong em.