KATOLIK Profesen Sosaiti PNG i tok strong egensim ol vailens i kamap long Pot Mosbi na Alotau long dispela ol wik i go pinis.

Presiden bilong Katolik Profesenel Sosaiti Paul Harricknen i tok long Pot Mosbi wanpela vidio i raun i soim tupela man i raunim wanpela man na kilim em.

Mipela i guria long kain pasin bilong nogat rispek long laip na digniti bilong man o meri.

“Tude mipela i lukim kapitel siti bilong mipela i stap long han bilong ol lain i save kilim manmeri.

“I nogat narapela tok ken long toktok long dispela pasin nogut.

“Mipela i lus long olgeta tingting olsem nesen,” Mista Harricknen i tok.

Long Morata long Pot Mosbi wanpela yangpela papa i kilim tupela pikinini bilong em. Na planti moa arapela vailens we i bagarapim kantri.

Narapela rabis nius mipela i kisim em long Alotau, Milen Be Provins.

Long Alotau, tupela trabel man i tekova long polis bareks bihain long ol i bagarapim taun na ol stua.

Harricknen i tok, “Mipela i no harim ol lida long olgeta level bilong gavman i visitim ol dispela ol trabel hap na traim long helpim daunim hevi.

“Mipela i singaut long olgeta lida long kirap long ol slip bilong yupela, long pret bilong yupela long COVID-19 long pret bilong yupela long lusim posisen na pawa bilong yupela na stat wok long kantri na pipel bilong en.

“Mipela i singaut tu long gavman long rausim wok bilong menesim COVID-19 Nesenel Pandemik long David Manning olsem kontrola na larim em i givim taim bilong em long ol lo na oda hevi long kantri.

“Nau long dispela taim planti wok i go long COVID-19 na nogat atensen long ol hevi na salens bilong wan wan de.

“Ol lida bilong yumi i mas luksave long ol praioriti bilong yumi yet na kisim ful kontrol long menesmen na kontrol long ol afeas bilong nesen.

Mista Harricknen I tok planti hevi mipela i bungim nau em i soim i nogat lidasip na gavanens we ol pipel i laiklukim long ol lida bilong ol.