NESENEL Kepital Distrik i save gat 12 Bod memba long makim ol nupela Ekseketiv long wokim lidasip wok insait long siti na tu sevim ol moa long milien pipel stap long siti na Sentral provins wantaim.

Dispela i no bin kamap taim olpela Edministreta bilong NCD i bin lusim spes stap nating inap long las wik, NCD bod i bin makim nupela edministreta bilong NCD Mista Francis Koaba olsem nupela Edministreta bilong NCD na Sentral Provins wantaim.

Nupela Edministreta bilong NCD Francis Koaba i bin tokaut long ai bilong Sinia Mejistret Tracey Ganai long bihainim olgeta wok bilong tupela edministresen taim Not Is Memba John Kaupa na Siti Menesa Bernard Kipit na ol arapela NCD memba i bin lukim stap.

“Mi komisina bilong NCD na mi lukim ful wok i stap namel long tupela gavman olsem na mi laik komitim mi yet long dispela wok na tok promis long bungim tupela edministresen wantaim long bildim gutpela rilesensip namel long tupela wantaim na surukim ol nupela divelopmen plen i go insait long Sentral provins na givim sans long ol pipel bilong sentral provins na NCD wantaim,” Koaba i tok.

“Mi amamas long joinim NCD bod long wok bung wantaim na sevim ol pipel bilong mipela stap long siti na Sentral provins wantaim bikos dispela em wanpela rot bilong divelopmen,” Mista Koaba i tok.

Siti Menesa Bernard Kipit i bin welkamim Francis Koaba long NCD Bod olsem nupela Edministreta bilong NCD long makim maus bilong tupela gavman na wok bung wantaim olgeta pipel.

“Mipela i laikim nupela senis bai kamap namel long tupela edministresen na divelopim moa plen bihain taim,” Mista Kipit i tok.

“Mi bin wet longpela taim inap nau mi amamas long kisim dispela wok na kamap wanpela memba bilong NCD bod olsem na mi bilip wanem wok bilong mi insait long bod bai bihainim wankain laik na tingting bilong dispela tupela edministresen NCD na Sentral provins,” Koaba i tok.

“Nau em luk fowat long wok bung wantaim komisin bod long balensim wok bilong tupela gavman wantaim,”em i tok.

Jacklyn Kimala i raitim