WANPELA han bilong Goroka Bes Haus sik long Isten Hailans i kisim nem Malcolm Kela Smith Senta.

Dispela i bihainim dai bilong biknem bisnisman na pastaim gavana bilong Isten Hailans, Malcolm Kela Smith long las mun.

Ekting siaman bilong Isten Hailans Provinsal Helt Atoriti, Tau Amevo i bin tokaut long dispela long taim em wantaim ol bod memba na menesmen bilong atoriti i bin go na soim las rispek bilong ol long taim ol i laik planim bodi bilong Smith long Goroka tupela wik i go pinis.

Amevo i tok ol gutpela na bikpela senis i bin kamap long haus sik taim Smith i bin stap siaman bilong Isten Hailans Provinsal Helt Atoriti.

Em i tok long dispela as luksave i mas go long em na wanpela han bilong haus sik em ol bai kolim Malcolm Kela Smith Senta long tingim ol gutpela wok Smith i bin kamapim.

“Helt sekta long provins i givim luksave long bikpela na gutpela wok em Malcolm Kela Smith i bin mekim long bringim divelopmen i go long helpim ol mama, ol pikinini na olgeta arapela manmeri long provins na kantri wantaim,” Amevo i tok.

“Han bilong haus sik we i gat daignostik na sejikal wod i stap, em mipela i kolim olsem Malcolm Kela Smith Senta.”

Smith i bin dai long Brisben haus sik long Australia long sik coronavirus (COVID-19).

Nau yet Isten Hailans Gavana Peter Numu ol pipel bilong Goroka na Isten Hailans i luksave long Smith long gutpela lidasip wok em i bin soim olsem gavana bilong Isten Hailans long 2002 i go long 2012.

“Smith olsem wanpela bikpela na gutpela man i go pas i kamapim Pacific Helicopters Kampani Grup we i ranim tu ol arapela bisnis olsem hotel, bilding na konstraksen we i helpim tru provins,” Numu i tok.

“Em i soim trupela kala bilong kamapim divelopmen long Goroka na Isten Hailans we ol pipel long provins bai i ken pilim na kisim helpim long em.”

Sape Metta i raitim