MEMBA bilong Namatanai na Minista bilong Diwai, Walter Schnaubelt i no ken mekim ol givim ol giaman eskus, wanpela Nu Ailan lokal level gavman presiden i tok.

Murat LLG presiden na lida bilong Gavman Bisnis long Nu Ailan Provinsal Asembli, Edwin Maigen i tok.

Em i tok Schnaubelt i no ken paulim ol tok olsem bikos ol de bilong provinsal asembli kibung i kamap long ol wankain de olsem bilong palamen, dispela i mekim em i no bin inap long kamap.

Em i tok, moa yet, tupela memba, Schnaubelt na Memba bilong Kavieng na Minista bilong Treseri, Ian Ling-Stuckey i no ken tok bikos ol i save kamap long ol palamen kibung na i no bin save kamap long ol provinsal asembli kibung, dispela i mekim asembli i rausim nem bilong ol long kamap long ol asembli kibung.

“Dispela em pani na tupela memba i wok long mekim moa ol giaman toktok,” Maigen i tok.

“Ol de bilong provinsal asembli long kibung i kamap long ol narapela de we ol i no save kamap long wankain de.

“Provinsal asembli i makim ol de bilong kibung wanpela yia pas long givim taim long ol memba long luksave.”

Maigen i tok wanpela spesel kibung we i bin kamap long wankain de em long 20 Epril, 2021 we asembli i holim kibung long givim gutpela toksave long ol wok bilong provinsal gavman.

Em i tok long 20 Epril, asembli i holim kibung long moning na palamen i holim namba wan kibung bilong em long apinun.

Em i tok pastaim long Gavana Sir Julius Chan i stap long asembli kibung, na long bihainim palamen lo, em i bin rait long palamen Spika, Job Pomat na i bin toksave long em olsem em bai i no inap kamap long palamen kibung long dispela de bikos em i gat asembli kibung long kamap.

Em i tok Chan i bin toksave tu long Spika olsem bihain long dispela de, em bai kamap yet long ol palamen kibung long ol narapela de.

Maigen i tok provinsal asembli i holim kibung long toksave long ol LLG presiden olsem provinsal gavman i no inap karimaut ol wok bilong em bikos long hevi bilong mani.

Em i tok ol royalti mani em gavman i save kisim long Lihir Gol Main, nau i go stret long tupela distrik na provinsal asembli i no moa kisim ol mani long karimaut ol wok bilong em.

Em i tok tupela memba i no ken tingting long kamap long ol asembli kibung long wanem asembli i rausim nem bilong tupela long taim yet bihain long ol i no save kamap long ol asembli kibung.

Gavana Chan i laik bai tupela memba i mas go bek long skul na lainim ol lo bilong holim ol provinsal na palamen kibung.