MADANG Distrik Divelopmen Authoriti (DDA) long las wik i bin baim K320,000 i go long Dipatmen ov Woks long Madang long haiarim ol masin bilong ol long stretim ol rot long Madang taun.

Memba bilong Madang na Jastis Minista, Bryan Kramer i bin givim sek long mani i go long Menesa bilong Woks long Madang, Henry Rakuasi long las wik Fraide.

Mista Kramer long taim bilong givim sek mani, i tok mani em bilong haiarim ol masin bilong Dipatmen ov Woks, long mekim wok inap long taim ol nupela masin bilong Madang DDA i kamap long Madang.

Em i bin tok tu olsem, em i no laikim ol praivet kontrekta long karimaut ol woks long wanem, ol i no save wok gut.

Kramer i tokaut tu olsem, ol dispela nupela masin bilong Madang DDA bai i kam klostu taim, na bai wok wantaim ol masin bilong Woks long karimaut ol wok.

Mista Rakuasi i tok Woks Dipatmen i amamas long Memba bilong Madang Open, long disisen bilong em na Distrik Divelopmen Atoriti long wok wantaim Woks.

Em i tok Woks Dipatmen i gat ol masin bilong wok i stap na bai amamas tasol long wok wantaim ol gavman lida, o ol memba bilong palamen olsem Mr Kramer, long bringim ol projek ol i go long ol pipel.

Em i tok tu olsem ol narapela memba husat i laik bihainim dispela kain wok bung olsem Woks nau i gat wantaim Madang Distik, i ken toktok long em.

Tasol Rakuasi i tok klia tu olsem, aninit long agrimen namel long Woks wantaim Madang DDA, distrik i  kisim tasol ol masin bilong wok, na olgeta enseniering na supavisen wok em i stap yet wantaim distrik.

Kramer i tokaut olsem, Distrik i kisim wanpela waitman pinis, husat nau i go pas long ol wok bilong Madang Taun Rot Mentenens program.

James G. Kila i raitim