INAP Trinde Epril 28 moa long 3,000 manmeri long Nesenel Kapitel Distrik i kisim pinis COVID-19 veksin.

Nesenel Pandemik Kontrola David Manning i tok dispela 3,000 em sampela bilong ol 8,000 AstraZeneca  veksin we Australia i bin givim long PNG long mun Mas bilong ol franlain woka husat i mekim wok bilong COVID-19 pandemik long PNG.

Ol franlain woka olsem ol helt woka, ol polis, koreksenel opisa, na ol soldia em ol sampela husat i kisim veksin pinis.

“Mi yet tu i kisim veksin pinis wantaim Praim Minista James Marape, Helt Minista Jelta Wong na ol arapela nesenel lida,” Mista Manning i tok.

“Mipela i go pas long wok bilong paiteg ensim COVID-19 olsem na mipela olsem ol risponsibel lida mipela i kisim AstraZeneca veksin. Na mipela i no ripotim yet ol hevi i kamap long mipela o ol 3,000 manmeri bihain long mipela i kisim dispela veksin.

“Wan wan i ken skelim na mekim disisen long kisim veksin o nogat tasol mi tok strong long olgeta manmeri, na moa yet long ol franlain woka i mas kisim veksin. Mipela i stap long fran long pait egensim COVID-19 na mi laik save olsem olgeta husat i pait i gat gutpela banis egens long varies we i kisim moa long 3 milien pipel pinis long wol olgeta,” Mista Manning i tok.

Nesenel Rol-aut plen bilong  COVID-19 veksin i stat pinis long Mas 25-26 wantaim trening long COVID-19 veksin long olgeta Provinsal Imejensi Operesen Senta. Bihain long dispela i bin i gat ol trening bilong ol kain kain taget grup long veksin program, maikro plening, veksin, imunaisesen seifti, komyunikesen na diman jeneresen.

Olgeta dispela trening program i ran yet.

Manning i tok ol i salim pinis AstraZeneca veksin long olgeta provins.

Long Mande Me 5 veksin program i stat.