GAVMAN i go het yet mekim wok long dispela taim nogut bilong coronavirus (COVID-19) na ol hevi em i kamapim, Praim Minista James Marape i tok.

Em i mekim dispela tok long taim gavman i makim 6-pela nupela vais minista long sapotim ol stet minista.

Em i tok dispela ol posisen em nogat memba i stap long ol long sampela taim na em i gutpela ol i makim ol memba nau.

Ol vais minista i sainim tok promis pepa bilong ol long ai bilong Gavana Jeneral Sir Bob Dadae long Gavman Haus, Konebobu long Tunde.

 “Maski long coronavirus na ol salens em i bringim, mipela i strong yet long karimaut wok bilong mipela,” Marape i tok.

“Dispela ol minista bai helpim long ol hap we strong i sot, ol bai inapim long karimaut gut wok.

“Mipela i no makim dispela ol minista bikos (2022) Jeneral Ileksen i wok long kam klostu.”

Marape i tok gavman i gat strong yet long karimaut ol wok bilong em long dispela taim.

Ol 6-pela vais minista em Memba bilong Ijivitari Richard Masere, Memba bilong Kairuku Hiri Peter Isoaimo, Memba bilong Angoram Salio Waipo, Bogenvil Rijonal Memba Peter Tsiamalili Junia, Memba bilong Raikos Peter Sapia na Memba bilong Kokoko Emil Tamur.

Masere bai helpim Praim Minista na Foren Invesmen, Waipo bai helpim Minista bilong Pablik Sevis, Tamur (Nesenel Plening), Sapia (Maining na Petrolium) na Tsiamalili Junia (Bogenvil Afeas).