GAVMAN i mas yusim ol yangpela long klinim ol taun na siti long kantri, Jeneral Seketeri bilong Katolik Bisop Konprens bilong Papua Niugini na Solomon Ailan, Pater Giorgio Licini i tok.

Em i tok dispela bai lukim ol yangpela i gat wok long mekim na i no stap nating na kamapim ol hevi.

Em i mekim dispela tok long las wik bihainim ol ripot bilong ol man i kilim ol arapela man i dai long kantri, moa yet long Mosbi siti.

Em I tok taim ol manmeri i gat wok long mekim na i gat samting long sapotim ol yet, ol bai i no inap tingting long go bagarapim ol arapela.

“Lukluk raun na yu lukim, pipia i pulap long ol strit bilong Mosbi olsem long Gordons, Waigani, Boroko, Gerehu na taun,” Pater Giorgio i tok.

“Nogat manmeri i klinim dispela ol ples.

“Ol baret tu i pulap long pipia na gras.

 “I gat wok tasol no gat man i mekim.”

Pater Giorgio i askim tu ol siti na taun atoriti long givim kontrak wok long ol yangpela long klinim na rausim ol rabis.

Em i askim ol atoriti long no ken givim kontrak wok long ol bikpela kampani.

“Yu givim kontrak long dispela ol kampani na wanpela man tasol i kisim olgeta mani na ol arapela i no gat,” Pater Giorgio i tok.

“Yu laik bai wan wan manmeri i sapotim ol yet orait yu givim ol wok.”

Em i tok em i no gutpela gavman i tok long wanpela samting tasol i no bihainim tok bilong em.

Em i tok taim ol yangpela i no gat wok, ol i no inap stap nating na kamap wantaim tingting bilong mekim ol pasin nogut.