KOMYUNITI trast i  mas stap long lukim gutpela wok bilong polis long Papua Niugini.

Transparensi Intenesenel PNG (TIPNG) i mekim dispela tok bihain long ol toktok i kamap olsem ol polis i bin holim wanpela wokman bilong wanpela midia haus taim em i kisim piksa bilong ol i rausim ol tebol maket long Gordons, Pot Mosbi.

Ol sut toktok bilong sampela seksen bilong polis i bagarapim ol pipel na nogat wok go het long sampela ol bikpela keis i ken kamapim nogat trast na kainkain tingting long nogat akauntabiliti insait long polis fos, TIPNG i tok.

TIPNG i amamas long ol wok bilong polis long helpim long daunim spred bilong COVID-19, tasol ol toktok i kam long ol viktim i soim olsem ating ol eksen bilong ol polis i ken luk olsem ol i abrusim mak bilong ‘risenebel fos’.

“PNG i lukim kamap bilong vailens long wanpela mak we em i go antap olgeta de insait long 12 mun i go nau. Dispela insiden long Gordons wantaim ol sut tok olsem polis i sut long gan na kilim tupela yangpela man long Sentral provins i kamapim pret long ol komyuniti long polis. Na dispela i kamapim bruk long trast,” Siaman bilong TIPNG Peter Aitsi i tok.

“Long stat bilong dispela mun wanpela intenesenel midia i putim aut wanpela ripot i no gutpela long wok bilong polis long Pot Mosbi. Bihain tasol polis i bin holimpas wanpela midia wokman na dispela i no gutpela long gutnem bilong kantri,” Mista Aitsi i tok.

“Ol pablik i laikim ol lida long mekim moa wok na i mekim ol politik disisen tasol. Wanpela gutpela hap bilong stat em long lukluk long Ripot bilong Royal Papua Niugini Konstabuleri Edministretiv Riviu Komiti 2004 na tingting long mekim ol eksen long pasin we bai i bringim impruvmen long lo na oda long kantri.

“Narapela rot long kisim bek pablik trast em long lukim olsem ol polis i mekim gut wok painimaut long ol ripot bilong polis i abrusim mak na kamapim ol insiden bilong abyus long pawa na ol i mas tokaut long pablik long ol risal bilong wok painimaut.

I mas i gat klia na strongpela sapot long Polis Dipatmen na olopisabilong Polis Intenel Afeas Dairektoret i kam long ol het bilong Polis Dipatmen na ekseketiv han bilong gavman.

Yumi mas tingim olsem gutpela polis husat i mekim wok stret bai i kamapim seif envairomen long komyuniti bilong yumi. Dispela bai i daunim ol lo na oda hevi bilong yumi na kamapim gutpela envairomen long pulim ol investa i kam, Mista Aitsi i tok.

TIPNG i sori tru olsem hevi i kamap long midia man i kamap insait long taim bilong Wol Pres Fridom De. Em i sanap wantaim PNG Midia Kaunsil na singaut long lukautim ol midia manmeri long lukim impoten wok ol i mekim na sapotim ol.