CARITAS Papua Niugini, Katolik Sios sosel jastis oganaisesen, i bin bungim na givim sampela samting long ol kalabus man long Bomana haus kalabus, ausait long Pot Mosbi long las wik.

Grup i bin go wantaim wanpela grup i pas long sosaiti bilong “Our Lady of the Sacred Heart” long St Martin de Porres peris long Morata long Pot Mosbi long mekim visit.

Ol i bin kisim olsem 700 pek kaikai na ol klos samting i go long dispela ol kalabus lain.

 Pater Martin Widyatmokosom na Sista Josepha Nebos bilong Our Lady of Sacred Heart (OLSH) i bin go pas long grup long givim dispela ol samting long ol.

Dispela wokabaut i wanpela hap autrits program bilong grup.

Bomana Haus Kalabus Program Opisa, Inspekta Roger Ative, wantaim ol opisa bilong em i bin bungim grup na i kisim ol i go long givim ol samting i go long ol kalabus lain.

“Mipela i no kam hia long bungim ol Katolik kalabus lain tasol.  Nogat. Mipela i kam long bungim olgeta kalabus lain,” Sista Josepha i tok.

“Jisas i no kam bilong bungim ol lain husat i gutpela na stretpela tasol.

“Em i kam bilong sevim olgeta sin manmeri.”

Ekting Bomana Haus Kalabus Komanding Opisa, Yellie Ouifa i tok em i amamas long lukim kain wokabaut olsem na i tok ol kalabus lain i amamas tu long dispela wokabaut.

Grup i redim kaikai bilong olgeta 700 kalabus lain na presen bilong wan wan bilong ol.

“Planti taim, taim ol manmeri i kam, ol i kam long meksimum-sekyuriti yunit na yunit bilong ol meri tasol,” Ouifa i tok.

“Ol i lus tingting long ol arapela lain husat i stap long bikpela haus kalabus.

“Kain wokabaut i mekim ol i amamas.”

 Michael Hurotove, husat i makim maus bilong ol kalabus man na i tok kain wokabaut i wanpela rot we i givim bel isi long ol.

Em i tok dispela i senisim liklik kain kaikai bilong rais, tinpis na tinmit em olgeta i save kisim long haus kalabus

Mavis Tito, Ekseketiv Dairekta bilong Caritas long PNG,  i tok tenkyu long ol Koreksinel Opisa long gutpela welkam na i tok dispela kain wokabaut i no laspela wokabaut ol i mekim.

Em i tok tenkyu tu long Colgate Palmolive PNG Limited na Wes Tigers tim long Australia long givim ol beanies, hat, ol skaf, ol samting ol i save putim long nek long taim bilong san, ol kula, ol botol bilong wara long dring na sampela moa ol arapela samting.

Em i hop dispela i stat bilong ol arapela gutpela wok ol bai mekim.

Jessica Oata i raitim