MANMERI long ples i no ken kisim tingting long stap long taun, Jeneral Seketeri bilong Katolik Bisop Konprens, Pater Giorgio Licini i tok.

Em i tok ples i gat olgeta gutpela samting i stap bilong sapotim laip.

Em i mekim dispela tok long las wik long taim ol ripot bilong ol man i kilim ol arapela man i dai long kantri, moa yet long Mosbi i wok long kamap.

Em i tok taun laip i hat long wanem manmeri i mas gat mani long stap.

Em i askim tu ol memba bilong palamen long kamapim gut ol sevis olsem dispela i ken pasim ol manmeri long ol i no ken painim dispela ol sevis na go long ol taun.

“Mi no inap askim manmeri long go long taun,” Pater Giorgio i tok.

“Bikos long taun, yu nidim mani long stap.

“Yu gat olgeta gutpela samting long bus na graun bilong yu long strongim yu.

“Em i wok tu bilong gavman long pasim ol manmeri long no ken kisim tingting long go long ol taun.”

Pater Giorgio long wankain taim, i tok em i hat long pasim ol manmeri taim ol i save laip bilong ol bai bagarap o birua bai kisim ol.

Em i tok lo na oda i wanpela bikpela hevi long kantri, moa long ol traibel pait olsem ol manmeri i save lusim ples long wanem birua bai kisim ol.

Em i tok dispela i wanpel bikpela salens, tasol em i tok em i gutpel taim yu pilim presen (stap) bilong gavman long komyuniti bilong yu.

Pater Giorgio i tok wanpela rot bilong strongim ol manmeri tu long stap long laip em edukesen.

“Taim ol manmeri i kisim gutpela skul, ol i save long rot bilong strongim ol yet,” em i tok.

“Kamapim Stet ov Imejensi o Vegrensi Lo i hap taim wok na i no inap pinisim hevi.

“Yu mas givim samting long ol we bai stap oltaim na i gat mining long laip.”

Paul Zuvani i raitim