Missionary Aviation Fellowship (MAF) wanpela balus ogenaisesen i amamasim 70 krismas bilong en long PNG dispela wik.

Bikpela astingting bilong MAF em long givim sevis long ol rurel ples long PNG.

Insait long wok bilong ol MAF i save mekim ol balus ran bilong en i go long 105 rurel ples balus. Ol i gat 9-pela balus we ol misineri pailot i save ranim.

Taim ol i go long ol rurel ples ol i save karim ol helt woka, ol tisa, ol misineri, ol marasin na skul saplai na metirel bilong wokim nupela klasrum o haus sik na baibel tu.

Las yia MAF i bin mekim wanpela bikpela wok sevei long olgeta 213 rurel ples balus bihainim ol standet bilong ranim liklik balus na mekim rekomendesen bilong stretim sampela ples balus bai balus i ken pundaun seif na bringim sevis. Nau em i ran long 105 ples balus tasol na ol arapela i wet long mentenens.

Nau long taim bilong COVID-19 ol i apim wok pasin bilong ol na bihainim ol COVID-19 protokol na go go het long sevim rurel pipel.

Wanpela bikpela wok MAF i wokim long ol yia i kam em long mekim ol medikol ivakuesen, na karim ol sikmanmeri na pikinini i go hariap long ol bikpela haus sik long ol taun olsem Wewak, Maunt Hagen na ol arapela taun . Las yia ol i mekim 81 medivek tasol bikos long COVID-19. Tasol namel long 2009 na 2020 ol i mekim 5,195 medivek olgeta na seivim dispela ol laip.

Wantok Niuspepa i tok bikpela amamas long gutpela sevis MAF i mekim long Papua Niugini inap 70 krismas olgeta.

Lukim ful stori bilong MAF long dispela niuspepa long neks wik.