LONG makim Wol Pres Fridom De, long Mande dispela wik Transparency International PNG (TIPNG) i lonsim “Investigative Journalism Awards 2021” long strongim na sapotim wok bilong ol jenelis long kantri.  

Taim em i lonsim dispela awot Siaman bilong TIPNG Peter Aitsi i tok bun tingting bilong Wol Pres Fridom De em “Infomesen olsem wanpela gutpela samting bilong pablik”.

Em i tok dispela bun tingting em i strongim ol tingting olsem transparensi na empawamen. Taim em i lukluk go insait long wanem samting ol jenelis i ken mekim long kisim ol infomesen, kamapim gutpela kontent o ol stori na putim i go aut, em i salensim tu ol gavman long kamapim ol lo we i givim bikpela ekses long ol jenelis long kisim infomesen.

Mista Aitsi i tok wanpela ripot (2021 World Press Freedom Index) we Reporters without Borders i putim aut i soim olsem 73 pesen long 180 kantri i save blokim ol jenelis long mekim wok bilong ol. Wok jenelis em i namba wan marasin egenesim ol kain kain infomesen i no stret na fri midia i save bildim trast long ol komyuniti.

Taim ol i lukluk long PNG ripot i tok olsem midia fridom long PNG i no stap long gutpela mak.

I gat tupela birua long midia fridom bilong PNG.

Namba wan em politikel presa na namba tu komesel presa. Eksampel em nau yet em i hat long kisim ol infomesen long APEC na nau COVID-19 long ripot long pablik.

Olsem patna bilong ol midia TIPNG i lukim midia olsem konaston bilong demokresi na wanpela impoten pos bilong integriti na gud gavanens long PNG.

TIPNG bai i mekim sampela moa wok long sapotim wok bilong midia long kantri long dispela yia.

Resis bilong dispela awot i op long olgeta jenelis long ol nius haus long Papua Niugini. 

Astingting bilong dispela dispela awot em long pusim ol profesenel jenelis long mekim wok painimaut, bihainim ol stori na putim ples klia ol paul pasin long olgeta ol nesenel isu.

Long winim dispela awot ol jenelis i mas mekim wok painimaut bihainim tripela kategori.

Namba wan kategori em long mekim wok painimaut long ol stetuori apoinmen na yus bilong pablik mani. Namba tu kategori em wok painimaut long seperesen bilong ol pawa. Na namba tri kategori em i op long ol jenelis long mekim wok painimaut long ol keis bilong korapsen long olgeta level olsem korapsen na braiberi long ileksen, gavanens bilong ol politikel pati, ol trensnesenel  na sabnesenel kraim.