PAPUA Niugini ekting Ilektoral Komisina, Simon Sinai i tokaut long ol de bilong 2022 Nesenel Ileksen long Pot Mosbi long dispela wik.

Em i tok ol writ bilong ileksen bai op long 14 Epril, 2022 we em i de bilong nominesen tu.

De bilong ol kendidet long nominesen bai pas long 21 Epril, 2022 .

Bihain long dispela kempen bai stat inap long poling i op long Jun we manmeri i vot long ileksen.

Ol bai kisim ol writ i go bek long Gavman Haus, Konedobu long 15 Julai, 2022.

Em i tok Komisin i save laikim moa long K200 milien long ranim ol ileksen.

Sinai i tok Komisin i plen long yusim baiometrik sistem (vot bihainim piksa bilong pinga bilong man) long vot.

Em i tok ol i bin traim dispela sistem long wanpela lokal level gavman ileksen long Abau distrik long stat bilong dispela yia na em i wok.

Em i tok sapos dispela i olsem em bai orait long yusim long ol narapela ilektoret long kantri tu.

Em i tok komisin i laikim K50 milien long ranim dispela sistem.

Praim Minista James Marape i tok em i taim nau kantri i mas bihainim ol nupela rot bilong vot long daunim pasin nogut we i save kamap long taim bilong vot we wanpela man inap vot moa long wanpela taim.

Em i tok dispela kain pasin i save kamap bikpela long Hailans rijon long taim bilong ileksen.

Em i tok wantaim baiometrik sistem, yumi bai lukim wanpela man i vot wanpela taim tasol.