NU AILAN Gavana, Sir Julius Chan i no surik long ol sut toktok long em bai lukim Ombudsmen Komisin long sampela asua em i mekim.

Em i tok em i no mekim wanpela asua na i no inap long haitim wanpela samting sapos kain wok painimaut i kamap.

Em i mekim dispela tok bekim ol toktok em Memba bilong Namatanai, Walter Schnaubelt and Memba bilong Kavieng, Ian Ling-Stuckey i sainim na givim long Sir Julius long dispela wik.

Tupela memba ol 5-pela kaunsil memba bilong tupela ilektoret i sainim wanpela pepa na i bin salim i go long Ombudsmen Komisin long mekim wok painimaut long ol asua Sir Julius i bin mekim.

Ol kaunsil presiden bilong Namatanai lokal level gavman, Konoagil LLG, Matalai LLG, Nimamar LLG, Sentral LLG na 6-pela ol wok kaunsila bilong dispela i LLG i mekim dispela ol sut toktok.

Ol i salim tu dispela ol sut toktok i go long ol arapela opis olsem Independen Korapsen Egensim Korapsen (ICAC), Polis Frod skwad long Konedobu, Odita Jeneral, Dipatmen bilong Inta-gavman rilesen na Fainens.

Ol i tok bihainim lo, Sir Julius i no kamapim wanpela fainensal ripot long las 14 yia long ol royalti mani provinsal gavman i save kisim long Lihir Gol main.

Tasol Sir Julius i tok dispela em i redi long wok bung wantaim wanem wok painim i kamap long opis bilong em.

“Ol i ken mekim wanem samting ol i laik mekim tasol mi i no inap surik,” Sir Julius i tok.

“Mi no gat wanpela samting long haitim na ol toktok tupela (Ling-Stuckey na Schnaubelt) i mekim em ol i no gat hevi long ol.”

Sir Julius i tok olgeta dispela toktok em ol i stretim pinis long Provinsal Asembli.

Em i tok pasin tupela memba i mekim i soim tupela no gat rispekt long em na opis bilong em.

Em i tok tupela i mekim olsem bikos tupela i hangre long kisim pawa.

Em i tok maski long dispela ol toktok em bai go het yet long mekim ol wok bilong em.