GUTPELA Edukesen i ki bilong lukim kamap bilong gutpela sosaiti, Jeneral Seketeri bilong Katolik Bisop Konprens (CBC), Pater Giorgio Licini i tok.

Em i tok sosaiti we manmeri i go long skul na i save lukim gutpela sosaiti.

Em i tok yumi ken toktok long kamapim stet ov imejensi (SOE) o kamapim Vegrensi Ekt tasol dispela i no inap stretim ol pipel long lukim gutpela sosaiti.

Em i askim tu sapos yumi mas larim ol sumatin i stap long skul inap long ol i pinisim Gret 10.

Em i tok i no gat seleksen i mas kamap namel long dispela ol yia na ol pikinini i mas stap long skul inap long ol i gat 15 o 16 krismas.

Em i tok taim yumi mekim olsem dispela i givim taim long ol yangpela long lain gut na i redi long stap long laip taim ol i pinis skul.

Em i mekim dispela tok long Wantok Niuspepa long dispela wik long taim ripot bilong ol man i kilim nating ol narapela i wok long kamap long kantri, moa long Pot Mosbi long dispela taim.

“Mipela i mas lukluk long ol yangpela bilong yumi na yusim ol rot bilong skulim ol long kamap ol gutpela manmeri long bihain taim,” Pater Giorgio i tok.

“Edukesen sistem i moa isi long yumi inap long skulim gut moa manmeri long wanpela taim.

“Taim ol yangpela i go long skul, ol i kisim save long rot bilong stap long laip.

“Yu no inap tingting planti taim yu save pikinini i lainin gutpela samting.”

Pater Giorgio i tok tu olsem arere long ol pikinini i kisim gupela skul, ol tisa tu i  mas kisim gutpela trening.

Em i tok ol tisa i no inap long givim gutpela skul taim ol i no kisim gutpela trening.

Em i askim gavman na ol arapela ogenaisesen olsem ol sios long ol i mas kamapim moa skul na trening senta we dispela i ken lukim moa ol manmeri i go long skul.

Em i tok tu olsem ol bisop bilong Katolik Sios bilong Papua Niugini na Solomon Ailan bai toktok moa long dispela ol salens taim ol i bung long Jun long narapela mun long kamap wantaim ol rot bilong bungim dispela ol salens.