NUPELA pati i kamap long Bogenvil, opisa i tok.

Dispela pati em Pipels Alaiens pati em pati presiden Pasto Albert Magoi i tok.

Em i tok ol i bin rait i go long opis bilong Ogenik Lo bilong Integriti bilong Politikal Pati na Kendidet (OLIPPAC) bipo long ileksen bilong presiden bilong Atonomus Bogenvil Gavman (ABG) long las Ogas tasol ol i no kisim wanpela bekim inap long stat bilong dispela yia.

Em i tok em i kisim bekim bihain long em i bin go long Pot Mosbi long lukim opis bilong OLIPPAC olsem nem i mas senis na opis i ken rejisterim pati.

Em i tok ol i bin givim nem Bogenvil Alaiens pati tasol opis bilong OLIPPAC i laik nem i mas senis.

Em i mekim dispela tok long taim opis i lonsim pati long Buka long pinis bilong las mun.

Magoi i tok opis bilong OLIPPAC i tok sapos pati i laik sanapim ol kendidet long resis long ol nesenel ileksen olsem 2022 jeneral ileksen orait em i mas putim nem olsem Pipels Aliens pati.

Taim em mekim olsem em i ken stap olsem pati na i kisim ol kendidet long olgeta hap bilong kantri na i no long wanpela hap tasol.

Magoi i tok ol i opim pinis opis bilong pati long Buka, Atonomus Rijon bilong Bogenvil (AROB) long taim bilong lonsing.

Em i tok ol i opim tu benk akaun long Buka long kisim membasip rejistresen fi bilong ol manmeri husat i laik joinim pati.

Em i tok membasip fi em K10 na dispela bai stap olsem 5-pela yia.

Em i tok long nau yet inap olsem 10,000 manmeri long noten hap bilong Bogenvil i baim membasip fi pinis na i kamap memba bilong pati.

Em i bilip olsem wantaim kain mak bilong laik long kamap memba, namba bilong membasip inap go antap moa long 60,000 long pinis bilong yia.

“Stat long ol 1960s i kam antap, i no gat wanpela kain laik bilong kamap memba bilong wanpela pati i kamap,” Magoi i tok.

“I no gat wanpela Bogenvil politikal pati long nesenel level inap long dispela taim.

“Bikos long dispela as rijon i wok long abrusim ol gutpela sosio-ikonomik divelopmen we i mas kamap long em.

“Nau em i taim ol Bogenvil i mas i gat gutpela maus i makim ol long nesenel level.”

Magoi i tok pati bai makim foapela kendidet long resis long foapela sia bilong rijon long 2022 nesenel ileksen.

Alex Munme i raitim