NUPELA deputi kontrola bilong COVID-19 nesenel pandemik em dokta Daoni Panuel Esorom.

Nesenel Ekseketiv Kaunsil (NEC) i mekim dispela apoinmen long Epril 19, 2021.

Dokta Daoni i kisim ples bilong Dokta Paison Dakulala husat i bin dai long Februeri dispela yia.

Pastaim long NEC i makim em Dokta Daoni i bin wok olsem PNG Nesenel COVID-19 Insiden Menesa long Nesenel Kodinesen Senta na tu em i Ekseketiv Menesa Pablik Helt Divisen long Nesenel Helt Dipatmen.

Dokta Daoni i gat ekspiriens long 23 yia olgeta insait long medikol, pablik helt, imejensi marasin, bisnis na menesmen na planti ekspiriens long program menesmen long pablik na praivet sekta.

Bihainim apoinmen bilong em Dokta Daoni i tok tenkyu long Praim Minista James Marape na NEC, Helt Minista Jelta Wong na Kontrola David Manning long ol i bilip long em i ken karim dispela wok.

Wantaim dispela nupela wokmak Dokta Daoni i luksave long ol salens i stap fran long em na ol wok em i mas mekim long daunim COVID-19.

“Salens bilong mipela em long luksave long ol wokmanmeri husat inap mekim wok aninit long nupela straksa we Kontrola Manning i apruvim na bringim ol i kam wok wantaim mipela long daunim COVID-19,” Dokta Daoni i tok.

Moa yet long lukluk bilong em long hau kantri i wok long hevi bilong COVID-19 Dokta Daoni i tok, “Nau long dispela taim yumi mas win long dispela pait egensim dispela vaires tasol yumi no wok olsem wan bikos yumi lukluk long ol pait we yumi no nid long pait long en. Ol dispela pait i banisim yumi long wok stret long hevi bilong COVID-19. I gat planti pipel i kamapim planti tok giaman na krangki toktok long COVID-19 na em i hap bilong dispela pait tu we i kisim yumi go longwe long pait tru bilong COVID-19. Yumi olgeta i mas putim tingting long daunim COVID-19.”

Em i tok moa olsem helt sistem bilong yumi i slek na yumi mas yusim rispons bilong COVID-19 long strongim dispela sistem gen na ol arapela sistem bilong gavman tu long nesenel level na i go long ol provinsal gavman, distrik na ol komyuniti.

Em i bilip wantaim helpim bilong ol pipel long bihainim ol mesa aninit long “nupela nomol” PNG i ken daunim COVID-19.

Em i singaut long olgeta pipel long no ken lustingting na i mas bihainim ol “nupela nomol” pasin.