PAPUA Niugini Difens Fos (PNGDF) i nau ken pilim seif long operet antap long skai bihainim wanpela  Memorandum ov Andastening (MoU) ol i sainim wantaim Sivil Eviesen Seifti Atoriti (CASA) PNG, eviesen reguleta bilong gavman bilong PNG,  long strongim seifti na statim wok bilong PNGDF antap long skai.

Komanda bilong PNGDF Meja Jeneral Gilbert Toropo i tok dispela MoU em i namba wan long histori bilong PNGDF na tu em i setim raitpela faundesen we ol operating ektiviti bilong Ea Trenspot Wing bilong PNGDF i ken operet wantaim seifti.

“Dispela MoU mipela i sainim i soim olsem PNGDF Ea Operesen i laik kamap wankain olsem ol arapela best long wol, na taim mipela i operet antap long skai olgeta stekholda bilong mipela i mas bilip long mipela. Ol ea opereta long PNG na intanesenel patna bilong mipela i mas save olsem mipela i inapim ol namba wan prektis na standet bilong wol long operet antap long skai,” Meja Jeneral Toropo i tok.

“Ol arapela operesen bilong PNGDF i save kamap na sevim ol pipel bilong PNG tasol Ea Trenspot Wing i no save operet. Olsem papa bilong PNGDF, mi wari tru na mi lukluk i go i kam long helpim dispela Wing long em mas wok. Mi laik tok tenkyu long wanpela tingting we mipela i bin kamapim wantaim ol Australian Difens Fos, Flait ov Ekselens tingting long 2019.”

Em i tok, bihainim dispela tingting, wanpela tim long Austraia Difens Fos i kam antap long PNG na i wokbung wantaim Ea Trenspot Wing we ol i lukluk na sekim wanem samting i mas kamap long Ea trenspot Wing i ken statim wok na operet.

“Ol teknoloji bilong eviesen na ol ektiviti bilong operesen long wol i go antap long narapela mak pinis. Maski mipela i militeri, mipela i mas bihainim na inapim ol namba wan prektis na standet bilong wol long operet antap long skai,” Meija Jeneral Toropo i tok.

Deputi Dairekta bilong CASA PNG, Kepten Tom Waqa i tok amamas long PNGDF long i go fowad long narapela mak long helpim kantri na tu inapim wokmak an astingting bilong PNGDF.

“Em i wokmak bilong CASA PNG olsem reguleta bilong eviesen na PNGDF olsem opereta bilong eviesen long wokbung wantaim na strongim seifti insait bilong eviesen long kantri,”Kepten Waqa i tok.   

Rebecca Negere i raitim