NESENEL Kepitol Distrik Komisin bai kisim kot oda long nau disisen bilong IRC Komisina Jeneral Sam Koim long brukim dispela NCD Guds na Sevis Takis reveniu.

Gavana bilong NCD Powes Parkop i bin tokaut klia olsem IRC i no bihainim etikol lo bilong pei i kam long Nesenel Gavman komponet bilong NCD GST i save wokim na givim long Sentral Provinsal Gavman.

Long Suprim kot insait long SCA 89 bilong 2013 i bin painimaut olsem NCDC i no bin brukim baset bilong en long Sentral Provins long las 14 yia i go pinis NCD i bin givim K140, 221, 000 (K140 milien) mani i go long Sentral Provinsal Gavman inap long 2020 ol bin salim gen K12, 050,000  (K12 milien) na long 2019 NCDC ol bin salim K14, 000,000 (K14 milien) gen long CGP.

Parkop i tokaut klia olsem Nesenel Gavman i save kisim ol GST bilong siti na brukim namel long olgeta provins wantaim Sentral Provins tu, namel long dispela GST Sentral Provins i save kisim K4,874,702 olgeta yia wantaim grants i kam long Nesenel Gavman long sapotim baset bilong en tasol NCD i no save kisim wanpela samting.

“Mipela i wanbel tasol long soim olgeta rekot bilong GST insait long siti long Jeneral Komisina Sam Koim na Odita Jeneral sapos tupela i laik lukim,” Parkop i tok.

“Mipela i no save sindaun nating na kisim samting tasol. Mi wantaim olgeta NCD memba bilong mi i save wok hat long yusim Krietiv na Inovetiv mani long kisim autkam bilong kepitol siti bilong mipela,” em i tok.

Parkop i tok dispela toktok bilong Mista Koim i rong olsem na em i laik kisim kot edvais long dispela hevi.

Em i tok dispela em gutpela samting long mekim taim Nesenel Gavman i save kisim K1.6 bilien GST long siti taim NCD i save kisim daunbilo long K260 milien.

Sentral Provinsal Gavman tu i bin toksave long NCD olsem sapos ol i no baim dispela ol austending GST long Sentral, em bai ol pasim olgeta pablik samting olsem pawa, wara saplai na ol rot i givim sevis long siti.

Parkop i bekim tok long narapela sait olsem em bai go long Suprim Kot long Fraide long kisim interim injaksen long salensim dispela disisen bilong Mista Koim.

Jacklyn Kimala i raitim