POLIS long Koki i tok olsem tupela maket long Koki i op bek long Mande na bisnis i go bek nomol.

Las wik hevi i bin kamap taim tupela man Tari i ranim na katim wanpela man Koiari na kilim em. Dispela I bin kamapim tensen namel long tupela etnik grup.

Senia Konstabol Kerry Kaman long Koki i tok ol i tambu long dispela tupela etnik grup insait long dispela pait long no ken yusim dispela tupela maket; Koki pis maket na Koki fres kaikai maket  inap hevi i go daun.

Buai maket i stap pas yet inap polis i tok orait long opim gen. Dispela em long wanem hevi i bin stat long dispela maket.

Tasol ol buai venda i no harim tok na ol i sanap raun baksait long maket na fran long klinik na salim buai yet.

Senia Konstabol Kaman i tok em i orait nau long ol pipel i ken go bek na yusim tupela maket long Koki.