MINISTA bilong Jastis Bryan Kramer i tok em i nidim K20 milien long baim moa long 2 tausen viles kot mejistret long kantri husat i no stap insait long perol.

Minista Kramer i tok wanpela disisen we i bin kamap long 2015 long kisim 2-pela moa pis opisa na tupela moa mejistret i go insait long wan wan viles kot sistem long kantri i gutpela tasol ol i no bin tingim gut olsem wanem bai ol i kisim mani long baim ol dispela pis opisa na mejistret.

Jastis Minista Bryan Kramer na Dipatmen bilong Jastis i nau wok long lukluk long wanem rot ol i bai painim K20 milien long helpim olgeta pis opisa na mejistret long olgeta viles kot sistem long kantri.

“Ol lain husat i mekim dispela disisen long bringim ol pis opisa na mejistret i go insait long viles kot sistem i no mekim gut wokpainim na askim ol yet olsem wanem bai ol i baim ol dispela pis opisa na mejistret na askim tu wanem samting bai kamap sapos ol i no gat baset long baim ol?” Jastis Minista Kramer i tok.

“Em long dispela as tasol nau na ol dispela pis opisa na mejistret i no bin stap insait long perol long 2015. Moa long 2 tausen viles kot opisa, ol mejistret na ol pis opisa i no stap insait long perol. I bin i gat wanpela peimen bilong K10 milien long las yia we i helpim long putim ol pis opisa long perol tasol ol mejistret i stap ausait yet long perol.”

Em i tok em i nidim wanpela baset bilong K20 milien long kisim ol dispela mejistret i go insait long perol.

Long wankain taim em i luksave long tupela hevi, wanpela em long putim ol long perol na namba tu em long lukluk i go bek long taim ol i statim wok inap tude na baim hatwok bilong ol o ol i kolim bekpe.

“Tasol husat bai wok long 5-pela krismas taim em i no kisim pe? Olsem na mipela i askim ol viles kot long painimaut husat i bin wok insait long dispela 5-pela krismas (2015-2021) na husat i no wok. Na husat i wok long 2015 i kam inap nau i bai kisim bekpe o pe bilong 2015 i kam inap nau na husat no wok bai no inap kisim,” Minista Kramer i tok. 

Rebecca Negere i raitim