DIPATMEN bilong Woks long dispela taim i laikim K4 bilien long givim long 325 kontrak wok i stap long stretim ol rot long kantri, Minista bilong Woks na Implementesen, Michael Nali i tok.

Em i mekim dispela tok long bekim askim bilong Memba bilong Abau, Sir Puka Temu long las wik Tunde palamen kibung sapos Nali i save i gat kontrekta i redi long stretim Magi Haiwe long Sentral Provins.

Sir Puka i tok rot long distrik bilong em bagarap tru na i stap long sori stap we ol kar i no inap ran i go i kam.

Ol arapela Memba olsem Is Sepik Gavana Allan Bird, Kairuku Hiri Memba Peter Isoaimo i bin mekim tu wankain ol askim long ol rot na bris long provins na distrik bilong ol.

Nali i tok long wan wan yia Dipamten i laikim K1.5 bilien long stretim na mentenim ol rot.

Em i tok long dispela dipatmen i no save kisim kain mani olsem em i laikim na dispela i bikpela salens long Dipatmen i karimaut ol wok bilong em.

“Dispela wok i no stap stret long han bilong Dipatmen long givim kontrak long ol wok i kamap.

“Dipatmen i stap olsem long namba foa lain bihain long ol lain olsem Supla na Tenda Bod na Fainens.

“Long wan wan yia Dipatmen i nidim K1.5 bilien tasol dispela i no save kamap.

Nali i tok bihain long Palamen i adjon em bai go raun long Magi Haiwe na lukim gut stap bilong rot.

Em i tok mak bilong mani Dipatmen i save kisim i no inap long stretim wanem rot we i nidim tru mak bilong mani we wok mas pinis.

Em i tok tenkyu long pastaim praim minista Peter O’Neill na gavman bilong em long givim K300 milien long wok mentenens na James Marape gavman long givim K100 milien long 2020 mani plen bilong em.

Em i askim tu wan wan ol Memba bilong Palamen long givim sampela mani long Distrik Sevis Impruvmen Program (DSIP) bilong ol olsem wanem ol rot i stap  long distrik bilong ol i ken kamap.

Palamen i surik long Trinde las wik na bai sindaun gen long narapela kibung long 10 Ogas.

Spika Job Pomat i surikim kibung long dispela taim bikos long pret long wanem sampela ol opisa bilong palamen i kisim sik coronavirus (COVID-19).