STAP bilong Kokoda Track na ol samting i pas long Track i piksa bilong gutpela poroman pasin i stap namel long Papua Niugini na Australia.

Ekseketiv Dairekta bilong Nesenel Musium na At Galeri (NMAG), Dokta Andrew Moutu i tokaut long dispela long taim Australia na Nu Silan i amamasim ANZAC De long las Sande.

Kokoda Track em rot namel long Pot Mosbi na Noten Provins.

Australia i bin brukim bus long dispela hap na i pait egensim ami bilong Siapan na i winim ol long taim bilong Wol Woa II.

Bikos long dispela win, long wan wan yia Australia i save givim gutpela luksave long dispela rot taim manmeri bilong em i wokabaut long dispela rot olsem ol turis na long de bilong ANZAC wanpela lida bilong ol i save kam long kantri na go olgeta long Kokoda long givim luksave bilong ol.

Las yia na dispela yia tu,  rot i pas na ol manmeri long Australia i no wokabaut long dispela rot bikos long kamap bilong sik coronavirus (COVID-19) na ol lo i pas long em.

“Maski i gat hevi bilong COVID-19, luksave bilong dispela rot na ol samting i pas long dispela rot i stap yet,” Dokta Moutu i tok.

“NMAG i kamapim ol nupela ples long lukautim ol samting ol ami i bin yusim long pait long Wol Woa II.

“Dispela ol samting i stap long haus long Guvava klostu long Alola viles long Noten Provins.

“Kamap bilong dispela haus i bikpela mak long lukim ol i holim na lukautim gut ol samting bilong pait olsem ol pikinini na visita long bihain taim i ken lukim na kisim save.”

Dokta Moutu i tok wok bilong lukautim ol samting bilong pait i hap plen bilong NMAG yet long Kokoda Track Militeri Herites Masta plen wantaim sapot bilong Kokoda Initiative husat i lukluk long opim yet track olsem ol visita na turis i ken wokabaut long em.

Em i tok bipo long NMAG i kamapim dispela ol haus, ol lokal manmeri i save lukautim dispela ol samting bilong pait we ol i bin stap moa long 80 krismas.

Em i kolim biknem “Fuzzy Wuzzy Angels,” na i tok PNG i no inap lus tingting long ol manmeri bilong tupela kantri husat i bin bung wantaim long pait egensim birua we i bin pait