WANPELA faiv memba Suprim Kot bens i rausim wanpela ileksen petisen o kot pepa we kendidet Wiliam Hagahuno i salensim win bilong Kainantu Memba, Johnson Tuke, long 2017 nesenel jeneral ileksen.

Jastis Paulus Dowa, husat i makim maus bilong bens na givim jasmen long las wik Trinde i rausim petisen bilong Hagahuno. Jastis Dowa i rausim petisen bilong Hagahuno bikos em i tok ol evidens bilong ol witnes bilong Hagahuno i no stret na i pulap long giaman.

Insait long petisen, Hagahuno i bilip olsem Mista Tuke i mekim braiberi na fosim ol lain long givim vot long en na em i winim sia bilong Kainantu Open. Petisen i tokaut olsem Mista Tuke i mekim ol dispela pasin long tupela ples long taim bilong kempen na petisen i singautim 8-pela lain long givim evidens olsem witnes.

Bihain long Kot i lukim na skelim ol evidens bilong ol wan wan witnes, Kot i painimaut olsem olgeta witnes bilong Hagahuno em ol sapota bilong en yet na ol det we ol witnes i givim long taim we Mista Tuke i mekim braiberi na fosim ol lain long givim em vot i kranki na i no wankain wankain. Sampela witnes i tok dispela pasin i kamap long Jun 9, 2017 na sampela i tok Jun 16, 2017.

Kot i painimaut tu olsem olgeta witness i asua na i no givim kopi bilong komon rol we i gat nem bilong ol we i soim olsem ol i stap long mak bilong givim vot.

Jastis Dowa i tok moa olsem, “Ol strongpela evidens i gat gutpela veliu we inap long helpim Kot na i go gut wantaim ol toktok i stap insait long petisen  bai helpim Kot long mekim gut disisen.

“Ilektoral Komisin i givim ol komon rol bilong ilektoret bilong ol 8-pela witness long soim olsem ol i stap long mak bilong vot tasol ol i no yusim ol dispela tu long sapotim petisen bilong ol,” Jastis Dowa i tok.

Mista Tuke i tok tenkyu long loya bilong en Paul Mawa, long i go pas long dispela keis bilong en long 4-pela krismas inap Kot i pinis.

“Em bin wanpela kain 4-pela yia mipela i stap insait long Kot, tasol mi laik tok tenkyu long ol sapota bilong mipela tu long stap isi insait long dispela proses. Sampela taim dispela Kot keis i save bagarapim sevis diliveri long ol pipel bilong mi long Kainantu,” Mista Tuke i tok.

Rebecca Negere i raitim