NUPELA Gavana bilong Bogenvil, Peter Tsiamalili Junia, i askim gavman long helpim ol ailan manmeri husat nau i bungim hevi bilong Klaimet Senis.

Em i tok ol manmeri bilong em long ol ailan olsem Motlok, Nisan, Tasman na ol arapela likik ailan olsem ol kamap refuji bilong Klaimen Senis nau.

Long toktok bilong hevi bilong Klaimet Senis, i gat save olsem dispela ol manmeri i namba wan lain manmeri long wol long kamap refuji bilong klaimet senis.

Mak bilong solwara i wok long go antap na karamapim ol ailan, ol ples na haus bilong ol.

Mista Tsiamalili i askim Praim Minista James Marape na Minista bilong Klaimet Senis, Wera Mori long go pas na wok bung wantaim Atonomus Bogenvil Gavman long strongim ol ailan manmeri bilong em.

Em i mekim dispela tok olsem Memba bilong Palamen long namba wan taim tok bilong em.

Em i tok gavman i mas givim inap mani long Bogenvil olsem em inap long helpim dispela ol lain husat i lusim ples bilong ol na i go long bik ples Bogenvil.

Em i tok tasol hevi kamap taim ol bik ples lain manmeri i kros pait wantaim ol taim ol i yusim graun bilong ol long mekim olsem gaden.

Tsiamalilil i tok gavman i mas givim K600 milien long wan wan olsem agrimen i stap.

Em i tok tenkyu long helpim bilong Yunaitet Nesen na Katolik Sios tasol dispela i no inap long helpim ol.

Em i tok nesenel gavman i no givim mani em i makim long em.

“Ol ailan manmeri bilong ailan bilong em, dispela gavman i lus tingting long ol olgeta,” Tsiamalili i tok.

“Mipela i toktok long hevi bilong klaimet senis tasol mipela i no lukluk long helpim ol lain manmeri bilong yumi yet husat i bungim hevi bikos long klaimet senis.

“Gavman i lus tingting long ol olgeta na olsem ol i mas painim rot long lukautim ol yet.”

Tsiamalili i tok sapos gavman inap long helpim dispela ol klaimet senis, dispela bai moa gutpela.