ATONOMUS Bogenvil Gavman (ABG) na Pasifik Institiut ov Lidas And Gavanens (PILAG) i bin sainim Memorandum of  Understanding (MoU) bilong kepesiti bilding long Tunde 27, Epril 2021.

Dispela wokbung wantaim bai helpim Bogenvil gavman long bringim level bilong kepesiti bilding bilong en i go long narapela level.

Minista bilong Pablik Sevis long Nesenel Gavman, Joe Sungi i bin autim tok amamas bilong em long disisen bilong ABG na PILAG long sainim dispela MOU.

“Dispela ivent i kamap nau i soim risal bilong ol toktok i karim kaikai. Ol toktok bilong redim na karimaut dispela patnasip i bin stat las yia 2020. Nau yumi lukim wok i stat long kamap,” Minista Sungi i tok.

Dispela MoU bai helpim ABG long trenim ol pablik seven bilong en na kamapim ol gutpela wokmanmeri we i ken andastenim wok bilong ol na bringim sevis i go long ol pipel bilong Bogenvil.

“PILAG em i wanpela institiusen tasol i gat luksave long givim ol pablik sevis program. Em i statim wok bilong en long nesen bilding stat long yia 1963 na i go het yet long mekim gutpela wok bilong em,” Minista Sungi i tok.

Minista Sungi i salensim ABG Minista bilong Pablik Sevis, Melvin Wilolopa long strongim tingting long kepesiti bilding bilong ol pablik seven bilong en. Em i tok save long ol wokmanmeri bilong yu, namba bilong ol pablik seven bilong, wanem ol posisen bilong ol na sapos ol i mekim wok bilong ol gut o nogat.

Mista Wilolopa i tok tenkyu tru na i amamas long dispela wokbung wantaim bilong ABG na PILAG. Em i tok trening em i impoten tru long olgeta ogenaisesen.

“Dispela MOU bai helpim gut tru Bogenvil Gavman long kamapim gut pablik sevis bilong Bogenvil.  Kepesiti bilding long nau i kamap bikpela samting tru long helpim na redim Bogenvil long kisim independens. Pablik sevis bilong Bogenvil i wok long gro olgeta yia. Olsem na dispela MOU em i impoten tru long helpim pablik sevis bilong Bogenvil long bringim sevis long ol pipel,” Mista Wilolopa i tok.

Long wankain taim tu, Minista Wilolopa na tim bilong em i givim namba wan K50, 000 bilong statim wokbung bilong tupela long nau na taim bihain. Mista Wilolopa i tok insait long baset bilong em, em i brukim na putim hap bilong PILAG long ranim ol kos bilong em.

Sif Eksetiv bilong PILAG, Michael Barobe i tok long Mas 1, 2021, em bai statim wok bilong em long Bogenvil.

Carolyne Ketsimur i raitim