PRAIM Minista James Marape i laikim bai i mas gat senis long Seksen 45 bilong Mama Lo (Konstitusen) bilong kantri long lukim Papua Niugini i kisim luksave tru olsem Kristen kantri.

Em i mekim dispela tok long Pot Mosbi long las wik taim Konstitusen Lo Rifom Komiti i opim Inkwairi i go insait long save sapos kantri i mas kamap Kristen tru.

Em i tok gavman i mekim disisen pinis long 23 Novemba, 2020 long mekim ol wok na mekim ol senis long ol toktok i stap long Seksen 45 bilong Mama Lo.

Mista Marape i tok long nau yet, PNG i kolim em yet olsem Kristen kantri long nem tasol.

Em i tok long kisim tru luksave, i no gat wanpela hap i stap long Mama Lo we i tok PNG i Kristen kantri.

Dispela tok i kamap ples klia taim wanpela saveman bilong Nesenel Risets Institut Profesa Eugene Ezebilo long 2 Septemba, 2020 wok painimaut pepa bilong em i tok, Mama Lo bilong kantri i no givim luksave olsem PNG i Kristen kantri.

Dokta Ezebilo i tok long kantri i kamap Kristen kantri tru, tupela senis i mas kamap; i mas i gat tok long Mama Lo na i mas gat Relijen (sios) em gavman i go pas.

Mista Marape i tok bai gat liklik senis tasol Seksen 45 bilong Mama Lo.

Em i tok olgeta tok long dispela seksen bai stap yet long tok olsem em i orait long wanpela i bihainim wanem kain kastom, tredisen na bilip em i gat long em.

Em i tok wanpela tok tasol em gavman i mas putim wantaim ol toktok Seksen 45 em long tokaut olsem PNG i Kristen kantri.

Em i tok long dispela seksen PNG i bihainim tok olsem mipela i kisim luksave long bihainim ol kastom na tredisen, ol veliu na prinsipel na bilip mipela i gat long em.

Mista Marape i tok komiti bai go raun wantaim foapela askim long kisim tingting bilong ol manmeri sapos:

• OL manmeri i ting PNG i Kristen kantri o nogat;
• PNG i mas bihainim ol Kristen Veliu na prinsipel; na
• Dispela ol veliu na prinsipel i mas stap olsem long Seksen 45; na
• Bai i gat mekimsave taim manmeri i brukim ol veliu na prinsipel bilong Kristen.

Em i tok gavman bai givim K2 milien long mekim dispela wok painimaut.

Ol gavman opis husat i stap insait long dispela inkwairi em CLRC, Dipatmen bilong Praim Minista na Nesenel Ekseketiv Kaunsil, Jastis na Atoni Jeneral na Komyuniti Divelopmen na