SAMPELA ol memba bilong palamen wantaim ol gavman opisa i laikim i mas gat ol meri i stap long palamen.

Nesenel Kapital Distrik Gavana Powes Parkop, Is Sepik Gavana Allan Bird na Ijivitari emba Richard Masere i wok long go pas long dispela ol tok.

Ol i tok palamen i mas kamapim lo long lukim i mas gat sampela sia i stap bilong ol meri i go insait long palamen na makim ol meri.

Ol i tok wantaim dispela lo, ol i no ken resis long jeneral ileksen tasol wanpela komiti i mas kamap na makim ol gutpela kendidet long sindaun long dispela ol sia.

Long wol, tripela kantri tasol i no gat meri long palamen na Papua Niugini i wanpela bilong dispela ol kantri.

Long dispela wik, ol i bung long Pot Mosbi wantaim ol meri lida na ol arapela man long askim sapos Gavman i mas kamapim wanpela lo we i mas gat sia bilong ol meri long Palamen.

Ekseketiv Opisa bilong Opis bilong Oganik Lo long Politikal Pati na Kendidet (OLIPPAC) Dokta Alphonse Gelu wantaim ol opsia bilong ol arapela opis olsem Komyuniti Divelopmen na Rilijon i bin stap tu long dispela bung.

Mista Parkop i tok ol meri tu i save mekim ol samting na ol inap long mekim ol disisen long divelopim kantri.

Em i tok em i gutpela long lukim ol meri i stap insait tu long palamen long mekim ol lo olsem kantri bilong yumi i ken ran gut.

Palamen long 2011 na 2012 i tok long kamapim dispela sia bilong ol meri tasol dispela i no bin kamap taim kantri i bin go insait long 2012 Jeneral Ileksen.