EM i namba wan taim long wanpela sab-rut bilong rut 1 bilong Lae siti bai kirapim wanpela PMV Ona Asosiesen insait long Lae.

Dispela nupela sab-rut asosiesen we bai kamap em 11D PMV Ona Asosiesen bilong ol bas i save ran long Igam i go long Eriku, Taun na Maket.

Long Sande 18 Epril long wanpela miting bilong ol 11D Bas Ona, tingting bilong kirapim dispela asosiesen i kamap na ol i makim pinis ol Komiti bilong asosiesen.

Siaman bilong 11D PMV Ona Ray Kuna i tok, “Mipela i laik fomim long helpim Rod sefti, Moto Viakol Insurens Ltd (MVIL), Lae PMV Bod na Trefik long daunim ol hevi isave bungim ol PMV na ol arapela hevi long rot bilong Lae na 11D sab-rut.”

Mr Kuna i tok moa olsem,” planti hevi olsem ol bas bilong highlands highwayna ol narapela rut tu we ino save opereit long sab-rut bilong mipela i save kam ron long 11D rut na taim asosiesen i kamap bai mipela i rausim ol taim ol i laik kam ron long sab-rut bilong mipla.”

Mr Kuna i tok, “taim dispela asosiesen kamap em bai helpim wokbilong Polis tu long kontrolim Lo na Oda hevi long rot na bas stop na tu lukluk long ol arapela hevi we idaunim mipela ol PMV Ownas olsem inkris bilong rejistresen fi.”

Narapela samting tu em Mr Kuna i toktok strong long en em olsem, dispela asosiesen taim em fom bai no inap larim kar we nogut tru na bagarap bai ron yet long rot long sab- rut 11D long wanem eksiden ken kamap long kain ol kar olsem.

Long dispela taim tu dispela asosiesen bai mekim strongpla wok long korona vairus protokols long ol PMV bilong ol, olsem ol pasindia mas werim mas na givim 1.5 spes.

Mr Kuna i tok,” mipela fomim Komiti pinis na mipela bai bringim igo long atorities olsem Rod Sefti, Lae PMV Bod na Rut 1 Asosiesen long givim tok orait long mipela long mipela bai kirapim sab-rut asosiesen bilong mipela.“

Long wanpela miting i bin kamap igo pinis wantaim ol Morobe PMV Ownas na ol bik bos bilong Trefik Registri, Polis Ofisa igo pas long Rod Sefti na Trefik, MVIL na Lae PMV Bod, Mr Kuna i kamapim tingting bilong em long fomim ol sab-rut asosiesen aninit long rut 1 Asosiesen insait long Lae na planti arapela PMV Ownas i laikim dispela tingting.

Penelope Aimari i raitim