Intenal Revenu Komisen (IRC) Jeneral Komisena i mekim disisen long burukim takis we i save go stret long Nesenel Kapital Distrik, long wanem ol pipel bilong Sentral, Galp na Motu Koitabu i no save kisim hap mani bilong ol.

Long Fonde 22 Epril, long midia stetmen bilong IRC, Jeneral Komisina Sam Koim i tok olsem, ol i bihainim Nesenel Kapital Distrik Komisin Ekt 2001 we i tok 60% takis i mas go stret long NCDC na, NCDC i mas givim Sentral Provinsal Gavman (10%), Galp Provinsal Gavman (3%) na Motu Koitabu (2%).

 Mista Koim i tok klia olsem IRC i givim stret takis i go long NCDC na ting em i mekim wok stret na givim hap mani bilong ol pipel bilong Sentral, Galp na Motu Koitabu.

“Olsem wanpela risponsibel edministeitiv het bilong dispela ogenaisesen mi bihainim stret lo, olsem lo i stap long en,” Mista Koim i tok.

Em i tok klia olsem maski ol i mekim olgeta samting, ol pipel bilong ol dispela tripela lain i no bin kisim mani bilong ol na ol i stap rabis yet.

“Taim mi kisim opis mi holim miting wantaim Gavana bilong NCDC na Gavana bilong Sentral long mekim wok go gutpela na go het yet,” Koim i tok.

Dispela hevi i pulim IRC i go insait long en, olsem na Koim i tok, “Mi bilip wanem samting nau mi mekim, em stret na long dispela mipela i ken abrusim moa ol hevi na ol kain kain kot.”

Olsem lejisleta i laik abrusim dispela hevi we ol yet i givim tok orait long en long mekim peimen i go stret long akaun bilong NCDC.

Olsem na Koim i tok, ”Ol lida we i lidim ol sab-nesenal gavman em ol lejisleta na sapos ol i laik senisim hau lo i stap long en orait ol i mas i go long Palamen na mekim olsem."

Penelope Aimari i raitim