TUMORA famili bilong pastaim Isten Hailans Gavman Malcom Smith Kela bai planim bodi bilong em long Pacific Gaden klostu long haus bilong em long Goroka.

Tasol pastaim long dispela Isten Hailans Provinsal Gavman na provinsal edministresen bai kamapim stet funeral sevis na bihain givim bodi i go long famili bilong em long planim.

Long dispela wik bodi bilong Smith i lusim Brisben, Australia na i go long Goroka, Isten Hailans Provins.

Isten Hailans Gavana, Peter Numu, provinsal edministreta John Gimisive, ol bod memba na menesmen bilong Isten Hailans Provinsal Helt Atoriti, ol menesmen na wok manmeri bilong Pacific Helicopters na Pacific Gardens hotel, ol famili wantaim ol sapota husat i putim graun i bin kamap long Pacific Helicopters teminol long Goroka ples balus long welkamim na kisim bodi bilong Smith.

Smith i bin dai long Mande Epril 04, 2021 bihain long em i bin i go long haus sik long Brisben long kisim marasin.

Em i dai long haus sik long hap taim em i stap aninit long lukaut bilong dokta.

Nau yet Isten Hailans Gavana Peter Numu husat i go pas long welkamim na kisim bodi bilong Smith i tok, ol pipel bilong Goroka na Isten Hailans i luksave long Smith long gutpela lidasip wok em i bin soim olsem gavana bilong Isten Hailns long 2002 i go long 2012.

“Smith olsem wanpela bikpela na gutpela man i go pas i kamapim Pacific Helicopters Kampani Group we i ranim tu ol arapela bisnis olsem hotel, bilding na konstraksen i helpim tru provins,” Numu i tok.

“Em i soim trupela kala bilong kamapim divelopmen long Goroka na IstenHailans we ol pipel long provins bai i ken pilim na kisim helpim long en.”

Numu i tok, provins bai i no inap lukim kain man olsem save na strong bilong wok long sampela taim.

Em i tok Smith i laik bringim helt, edukesen na ol arapela sevis i go long divelopim ol rurel eria long provins we ol pipel i ken kisim helpim long em.

Maski sapos em i waitman, em yet i save tokim ol lokal pipel long provins olsem em bilong Isten Hailans.

Em i givim em yet long divelopim provins long wok bilong edukesen, helt, rot na trenspot.

Numu i tok long taim Smith i bod siaman bilong Isten Hailans Provinsal Helt Atoriti (EHPHA) long kamapim divelopmen insait yet long helt sekta bilong provins, em i kisim sapot na helpim i kam long olpela gavman aninit long lukaut bilong praim minista Peter O’Neill we ol i mekim nupela stet-ov-da-at  haus bilong daignosim na sejikol senta long provinsal haus sik long Goroka long Jenueri, 2018.

Bodi bilong Smith i stap long funeral home long Goroka long dispela taim inap long tumora.

Sape Metta i raitim