NUPELA Minista bilong Sivil Eviesen, Sekie Agisa i strongim tingting bilong Nu Ailan Gavana Sir Julius Chan olsem em bai lukluk long stretim ol hevi i pas long Kavieng ples balus.

Mista Agisa i tok olsem taim em i lukluk raun long Kavieng ples long 26 Epril, 2021.

Minista i go raun long sekim ol mentens wok long ranwei na teminel (haus pasindia) na 1.5 kilomita ekstensen bilong ples balus.

Sir Julius i bin askim sapos kontrekta, China Railway Construction Engineering Group (CRCEG ) inap mekim haus pasindia i gat lukluk bilong Nu Ailan ples we Drongo i mas stap.

Em i askim tu sapos gavman i mas givim olgeta dispela K15 milien kompensesen mani em gavman i gat long ol papagraun.

Em i tok gavman i bin givim K3 milien long las yia tasol taim ol papagraun i kisim i go long benk, i no gat mani i stap long akaun.

Sir Julius i laikim bai gavman i givim ona long komitmen bilong em na givim stret dispela mani i go long ol papagraun.

Bihain long ol toktok Sir Julius i soim Minista Agisa wantaim tim bilong em long ol wok i kamap long Kavieng ples balus.

Mani mak bilong stretim ples balus i stap long K91.85 milien tasol dispela nau i go long K115.9 milien. Kampani i plen long pinisim wok long Julai, 2022.

Ol arapela opisa husat i go tu na sekim ples balus em Nesenel Eapot Koporesen Ekting Menesing Dairekta Rex Kiponge na Sivil Eviesen Divelopmen Invesmen Program (CADIP) Projek Menesa Manuai Kameta na ol opisa bilong Nu Ailan Provinsal Gavman.

Pastaim gavman aninit long Peter O’Neill i bin kisim klostu K2 bilien dinau mani long Asia Developmen Benk (ADB) long 2016 na dispela mani nau i wok long kamapim ol ples balus long planti hap bilong kantri.

Aninit long CADIP program gavman i bin stretim ol ples balus na wokim ol nupela haus pasindia long ol ples olsem Hoskins long Wes Nu Briten; Kagamuga long Mt Hagen (Westen Hailans); Goroka (Isten Hailans); na bai lukluk long stretim na apgredim Boram long Wewak (Is Sepik), Vanimo Ples Balus (Wes Sepik) na Madang na Kikori Ples Balus na teminol (Galp).