LONG Tunde 20, 2021, wok komiti na ol go pas lain bilong ol Kainantu komyuniti long Pot Mosbi i bin holim wanpela bung bilong ol long autim bel hevi bilong ol long bikpela pait we i wok long kamap namel long tupela traib. Tapo na Kainava long Kainantu.

Dispela bikpela pait i bin kamap bikos long hevi bilong graun. Pait i bin stat long Epril 8, 2021 na i kisim laip bilong 39 manmeri na moa yet i wok long lusim laip. Planti propeti i bagarap bikos ol lain i yusim ol pawa gun na bom long taim ol i pait.

Wok komiti we i makim ol pipel bilong Kainantu long Pot Mosbi i autim bikpela tok sori bilong ol i go long ol pipel  bilong ol long Kainantu long bikpela bagarap ol i kisim bikos long dispela pait.

“Mipela ol pikinini bilong Kainantu na long Isten Hailans hia long Pot Mosbi i salim bikpela tok sori bilong mipela i go long yupela long dispela bikpela hevi i kamap. Lewa bilong mipela i bruk na mipela i pre na askim God long givim bel isi long yupela long dispela taim nogut” Siaman bilong Kainantu Wok Komiti, Samuel Uge i tok.

Mista Uge i tok moa olsem em na Komiti bilong em na olgeta Kainantu pipel husat i wok na stap long Pot Mosbi i redim pinis petisen bilong dispela isiu na ol bai givim i go long 9-pela memba bilong Isten Hailans na Kainantu long Palamen long Fonde 22, 2021.

Wok Komiti i askim gavman long putim Stet Ov Emejensi (SOE) na salim moa Polis Mobail Skwad na Difens Fos i go long Kainantu.

Long dispela taim moa long 5000 laip long tupela traib wantaim i bagarap. Olgeta ples arere long taun i bagarap na ol pipel i ranawe nambaut.

“Olsem ol lida bilong mipela, mipela askim yupela ol Memba bilong Isten Hailans na Kainantu long stap na kisim petisen we mipela bai bringim i kam long yupela long Fonde,” Komiti memba na Dairekta bilong Partner with Melanesians Inc (PwM), Ken Mondiai i tok.

Ol sios ogenaisesin, Women grup, Bisnis haus i wok long helpim ol pipel husat i kisim bagarap na kisim ol i go long haus sik. Ol givim liklik kaikai long ol tasol dispela i no inap.

Wok Komiti i askim gavman long lukluk long dispela hevi na helpim bipo em i go bagarap moa. Long dispela taim ol polis na difens i wok long lukautim ol propeti bilong stet. Gavman i mas salim sampela moa Polis na Difens fos i go long kontrolim ol pipel.

Carolyne Ketsimur i raitim