TRANSPARENCY International PNG (TIPNG) i nau singautim Gavman long givim ol ripot bilong ol mani bilong COVID-19 long kisim bek bel bilong ol pipel.

TIPNG i mekim dispela singaut bihainim bikpela konsen bilong ol pipel long save long fainensal ripot bilong COVID-19 mani.

“Bilip bilong pablik long Nesenel Gavman na Nesenel COVID-19 rispon i lus nating bikos Nesenel Gavman na Nesenel COVID-19 rispon wantaim i nogat gutpela ripot bilong mani bilong COVID-19 ol i yusim olsem wanem. Ol manmeri na pikinini long Papua Niugini i bai gat tupela tupela tingting long gavman long lukautim ol hevi bilong helt sapos ol i no gat bilip na strongpela tingting long Gavman i menesim ol pablik mani,” Siaman bilong TIPNG Bod, Peter Aitsi i tok.

TIPNG i wok long toktok strong long akauntabiliti bilong ol mani bilong COVID-19 long taim kantri i tokaut long Stet ov Imejensi (SOE) long 2020 i kam inap tude.

“TIPNG i wok long skelim ol infomesen ol i kisim long situesen ripot bilong PNG long World Health Organization we i soim ol mani i go insait long Tras Akaun bilong Gavman. Ol i mekim dispela long putim ai long mani bilong COVID-19 rispon i go we. Tasol dispela em i no olgeta infomesen, kain olsem, i no gat wanpela ripot i go long pablik long ol helpim we Gavman i kisim long ol intanesenel dona o i no gat wanpela ekspenditsa ripot i go long plua bilong Palamen, nogat tru,” Mista Aitsi i tok.

Long helpim ol pablik, Fainensal Prokyumen Komiti bilong Nesenel Gavman aninit long Pandemik Ekt, i mas givim ol infomesen bilong:

• Ol prokyumen we Opis bilong Kontrola i givim tok orait long en
• Ol helpim i kam long ol development patna na ol dona patna long mani na ol samting tu
• Ol mani i go long ol Provinsal Helt Atoriti na stetus bilong akwital bilong ol
• Ful Intenel Odit Ripot we Pape Accountant i mekim long 2020

Taim Palamen i nau surik i go long Ogas 10, 2021, toktok bilong trensperensi na akautabiliti long menesmen bilong COVID-19 mani em i bikpela samting tru. TIPNG i nau singautim Nesenel gavman na Fainensal Prokyumen Komiti long givim ripot bilong COVID-19 mani long pablik, bikos em i bikpela samting long kisim bel bilong pablik long COVID-19 rispon na wok bilong Gavman tu.