OL Menesmen bilong Kuima Security Service i givim 8-pela saspek i go long Polis long las wik Fonde.

 Ol dispela 8-pela lain em ol saspek bilong wanpela hevi i bin kamap long Jackson Intanesenel Ples Balus i no longtaim i go pinis.

Wanpela pait we i bin kamap namel long ol wokmanmeri bilong Kuima Security Service  na Asila Security Service i bin stopim ol ran bilong ol balus na bagarapim ol propeti na kar bilong Nesenel Eapot Koperesen (NAC).

Brens Menesa bilong Kuima Security Service long Pot Mosbi, Amos Laufili i tok NAC i gat K3 milien dinau long Kuima Security Service long ol sevis ol i givim long Eapot.

Nupela Menesing Dairekta Rex Kiponge i bin abrusim lo na i rausim kontrak bilong Kuima Security Service nating. Dispela i mekim na ol i karim i go long Kot long stretim. Kot i putim Kuima Security i go bek gen long wok na ol i bai wok inap NAC i baim bek olgeta dinau bilong ol.

Tasol NAC Menesmen i go het na sainim kontrak wantaim Asila Security maski Kot i mekim disisen long putim Kuima Sekyuriti i go bek.

Dispela i mekim na wanpela pait i kamap namel long ol sekyuriti bilong Asila na Kuima long Jackson Ples Balus i no longtaim i go pinis. NAC Menesmen i rausim tupela sekyuriti kampani wantaim bihain long dispela pait.

Praim Minista James Marape i opim wanpela sait wokpainimaut long dispela hevi. Jeneral Menesa bilong Kuima Security Thomas Koni na Pot Mosbi Brens Menesa Amos Laufili i givim ol dispela 8-pela saspek i go long Polis Kriminal Investigen Divisen.