KONSTITUSENEL Lo Rifom Komisin (CLRC) i givim wanpela ripot bilong drag na alkahol i go long  Jastis Minista na memba bilong Madang Bryan Kramer long Pot Mosbi, las wik.

Insait long dispela ripot, i gat riviu bilong ol Lo bilong yus na abyus bilong alkahol na drag na tu 21 rekomendesen o tingitng ol i putim long senis i mas kamap long legal o sait bilong lo, polisi na edministresen na long institusenel rifom bilong drag na alkahol.

Komisina Dokta Allen Marat bilong CLRC husat i makim maus bilong CLRC na givim ol dispela ripot i go long Jastis Minista Kramer i tok  ol dispela 21 rekomendesen i stap insait long riviu em i isi tru long mekim, em i prektikel o inap long mekim, em i ken i go bikpela na tu dispela rekomendesen i kamap antap long ol evidens.

“Dispela ripot em i no samting bilong pablik yet inap ol i presentim em long plua bilong Palamen,” Dokta Allen Marat i tok.

“Long kamapim dispela ripot, em i wanpela samting, tasol long Gavman na Palamen long kisim dispela ripot na ol rekomendesen na mekim eksen antap long ol rekomendesen em i narapela samting olgeta. Olsem na mi laik strongim na salensim gutpela Minista na Gavman long mekim eksen antap long dispela ripot.”

Taim ol i mekim dispela ripot, ol i painimaut olsem, i gat ol lo na regulesen i stap long putim ai long prodaksen, distribusen na konsamsen bilong ol drag na alkahol tasol planti bilong ol dispela lo em bilong 1960 na 1970 olsem na ol i no inap long putim ai gut long ol drag na alkahol bilong nau taim.

“I gat bikpela nid long apdeitim ol dispela lo long inapim nau taim. Bikpela wokpainim i bin kamap we i kisim lukluk na tingting bilong olgeta rijon long kantri long mekim dispela ripot,” Dokta Marat i tok.

Jastis Minista Kramer i tok,“Dispela ripot em i bikpela ripot tru long lukluk bilong mi bikos drag na alkahol abyus em i wanpela birua bilong PNG we i save stap insait long kantri yet na bagarapim ol yut na pikinini bilong mipela, olsem na mi bai no inap long larim em i go sindaun nating i stap, mi na Gavman bilong Marape bai lukluk long dispela na mekim eksen.

Rebecca Negere i raitim