MANMERI i no ken pret long kisim banis sut bilong coronavirus (COVID-19), Kardinal Sir John Ribat i tok.

Em i tok God i bin mekim heven na graun na olgeta samting i stap long ol na em i save long stap bilong yumi.

Em i tok yumi inap stap gut taim yumi bilip na putim tras long em.

Kardinal Ribat i mekim dispela tok long las wik Fonde long taim em strongim tingting bilong ol manmeri husat i gat planti tingting long kisim banis sut na ol hevi i kamap long stap bilong COVID-19.

Em i mekim dispela tok tu bihain long em i bin kisim banis sut bilong COVID-19 long Pot Mosbi long las wik Fonde.

“Mi no pilim wanpela hevi i kamap long bodi bilong mi.

“Yes, i gat pret na planti lain manmeri i wok long pret long kisim dispela sut.

“Tasol yumi mas strong bikos dispela i gutpela bilong yumi na stap bilong ol arapela i stap klostu long yumi.’

Long wankain taim, Kardinal Ribat husat i vais presiden bilong Papua Niugini Kaunsil ov Sios (PNGCC) i makim 21-de bilong prea stat long las wik Fonde.

Dispela long ol sios i ken prea na askim long marimari bilong Bikpela olsem ol pipel i ken stap gut long dispela taim bilong coronavirus (COVID-19).

Ol sios i bihainim rit long Buk bilong Asaia 40:31 we i tok: “Tasol ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.”

Ekting Siaman bilong Kaunsil, Kardinal Sir John Ribat i askim ol Kristen manmeri long ol i mas givim taim long pre na askim long helpim bilong Bikpela.

“Dispela em i taim we mipela i mas bung wantaim olsem pipel bilong God, pre na mekim penans na pait egensim COVID-19 i laik bagarapim laip,”em i tok.

Kardinal Ribat i tok long lukluk bek long ol salens em wan wan manmeri na famili i wok long bungim long dispela taim bilong sik.

Em i tok planti ol manmeri i laikim pre olsem ol i kisim strong long bungim dispela ol salens bilong pret na long ol manmeri husat i bin kisim COVID-19 manmeri na long ol nem nogut ol i kisim long ol arapela lain.