DIPATMEN bilong Pesenel Menesmen i nau yusim wanpela onlain eplikesen olsem nupela tul bilong wok wantaim.

Dispela onlain eplikesen tul i ken helpim ol long stap longwe na mekim wok aninit long ol nupela lo i kamap bihainim hevi bilong COVID-19.

Ol Menesmen Infomesen Sevis tim bilong DPM i kamapim dispela eplikesen o tul we ol i kolim Google Teams. DPM i kamapim ol dispela samting long painim rot bilong mekim gut wok bilong ol insait long dipatmen na  long ausait wantaim ol arapela opis bilong gavman aninit long nupela nomol.

Seketeri bilong DPM, Mis Taies Sansan i tok, bikos ol pablik seven i wok long bungim planti salens namel long COVID-19 i gat bikpela nid long painim narapela rot long mekim wok we i ken helpim long daunim COVID-19.

“Bikos mipela i go pas long ol arapela opis bilong gavman, mi tok strong long DPM i mas yusim ol kain tul long mekim wok na mi amamas olsem ol wokmanmeri bilong mi i nau ken yusim dispela eplikesen long holim ol miting na woksap we i bai holim moa long 10-pela man insait long wanpela rum na tu long taim bilong toktok wantaim ol wanwok long ol arapela provins,” Mis Sansan i tok.

Long Epril 14, 2021, ol Ekseketiv Menesmen long DPM i holim wanpela miting wantaim dispela Microsoft Google Application long opim wok bilong dispela tul.

“Maski mipela i bungim sampela teknikel hevi namel long miting, miting bilong ol Ekseketiv Menesmen i bin kamap gut,” Seketeri Sansan i tok.

Seketeri Sansan i tok, ol arapela opis bilong gavman tu i ken yusim kain ol samting long soim olsem ol pablik sevis i bihainim ol lo bilong COVID-19 aninit long Nesenel Aisolesen Streteji bilong gavman.

“Olgeta samting DPM i wok long mekim i stap em long bihainim lo bilong COVId-19 na toktok bilong dipatmen na opis bilong Kontrola long nid bilong ol gavman bisnis long i go het na ol pablik seven long i go het na mekim wok,” Seketeri Sansan i tok.