GAVMAN bilong PNG i bin welkamim tupela nupela lida bilong haus Palamen long Tunde 20 Epril, 2021 taim palamen i sindain gen long dispela wik.

Tupela nupela lida i joinim Palamen sindaun long Tunde apinun em Memba bilong Kandep  Open Don Pomb Polye na Memba bilong Bogenvil Peter Tsiamalili Jnr.

Nupela Memba bilong Kandep Open Don Pomb Polye  i mekim tok promis long haus Palamen bilong Mama Lo long kantri long karim hevi bilong gavman wantaim pipel bilong em long Kandep ilektoret bihain long em i  sindaun long sia bilong palamen.

Don Polye i tok tenkyu long olgeta pipel bilong em long Kandep ilektoret long  sapot em i kisim inap kot i tokaut olsem em nupela memba bilong Kandep Open.

“Olsem nupela memba bilong Kandep na Palamen mi laik mipela olgeta i mas joinim han na wok bung wantaim long karim hevi bilong kantri wantaim pipel bilong mipela long gutpela rot,” Polye i tok.

Em i tokaut olsem dispela i soim sain bilong spirit i no go daun tasol stap strong long sapotim wanpela narapela na senisim pes bilong lidasip na gutpela gavanens long Kantri.

“Nau taim bilong luk fowat long wanem ol hap wok we mipela i bin lusim stap na stat bildim gen wantaim klinpela rot bilong ilektoral Komisin,” Polye i tok.

Nupela Memba bilong AROB Peter Tsiamalili Jnr i tokaut klia long wok bung wantaim Gavman bilong PNG na Bogenvil long luksave long ol sampela wok bilong Bogenvil we i no pinis na nidim sapot bilong Nesenel Palamen.

Em i tok dispela em bikpela ona long joinim Gavman na makim ol pipel bilong Bogenvil long dispela taim bilong hevi.

Jacklyn Kimala i raitim