ABC Abandon Child Nuture Asosiesen (ACNA) i askim gavman na ol ogenaisesen long helpim 22 pikinini i nogat haus na i stap long famili yad long Morata 2, Nesenel Kapital Distrik.

Faunda bilong asosiesen Christy Yanis i tokim niusman olsem em nau i wok long painim hat long inapim ol besik nids bilong ol dispela pikinini olsem; kaikai, wara, klos, edukesen na gutpela haus bilong ol.

Em i tok namba bilong ol pikinini i kam long em i wok long go antap long olgeta yia.

“Taim namba bilong ol pikinini i wok long go antap ol samting bilong lukautim ol tu i wok long sot na dispela i kamapim hevi long hau bai mipela lukautim ol gut,” em i tok.

Misis Yanis i tok faivpela yia i go pinis taim em i bin stat long kisim ol pikinini long strit bilong Pot Mosbi na lukautim ol, em i no bin kisim wanpela helpim i kam long gavman o ol narapela ogenaisesen.

Em i tok, “Mi stat wantaim foapela pikinini long 2015 na long dispela yia i kam inap nau i nogat wanpela i sapotim tasol mi save lukautim ol na nau mi gat planti moa pikinini long lukautim.

“Tupela bilong ol dispela foapela pikinini, mi bin kisim pastaim wanpela i pinisim gret 12 na narapela i pinis long gret 10 long las yia tasol bikos long skul fi problem tupela wantaim i stap nating long haus,” em i tok.

Misis Yanis i nogat wok tasol em i save samapim klos na salim long kisim liklik mani na wantaim sapot bilong man bilong em, em i save helpim ol pikinini.

Em i tok astingting bilong em i stat long kisim na lukautim ol pikinini em long givim ol klos, putim ol long haus, lukautim haijin, kisim edukesen na sponsaim ol i go stadi na bai ol inap helpim ol yet long bihain taim.

Misis Yanis em i no tisa na tu em nogat skul metirel na klasrum tasol em i save lainim ol pikinini long besik edukesen wantaim liklik save em i gat.

Em i tok olsem mama mi pilim pen long lukim ol pikinini i stap olsem nogat papamama olsem na mi wok long traim long helpim ol wantaim liklik mi gat long salim ol i go long skul.

Tasol Misis Yanis i tok long helpim ol gut, mipela nidim sapot bilong gavman na ol narapela ogenaisesen long helpim na mekim driman bilong ol i kamap tru.

“Mi laikim gavman na ol narapela ogenaisesen long sapotim mipela bikos dispela ol pikinini i impoten sapos yumi helpim ol nau, long ol i ken helpim long bildim kantri bilong yumi long bihain taim,” em i tok.

Misis Yanis i tok bai mipela raitim ol askim pepa i go long ol ogenaisesen long sapotim na tu mipela welkamim husat ol ogenaisesen i laik sapotim o wok bung wantaim mipela long lukautim ol dispela kain pikinini.

Joseph Dawai i raitim