GAVMAN bai kamapim yet ripot bilong mani em givim long pait na daunim sik coronavirus (COVID-19), Tresera Ian Ling-Stuckey i tok.

Em i tok gavman i bin makim K5.7 bilien long pait egensim dispela sik na long strongim ikonomi long dispela taim.

Em i tok kamap bilong COVID-19 i no givim hevi long helt tasol long ikonomi wantaim edukesen na gavman i wok hat long tupela sait wantaim.

Em i mekim dispela tok long bekim askim bilong Memba bilong Ialibu-Pangia Peter O’Neill sapos gavman bai kamapim dispela ripot.

Em i tok bikos long dispela em i no isi long kamapim kain ripot long sotpela taim tasol.

Em i tok long dispela gavman i bin makim K600 milien long pait egensim COVID-19 na narapela hap bilong strongim ikonomi.

O’Neill i tok PNG i wok long kisim mani helpim long dona ejensi na olsem ol tu i laik save rot gavman i yusim mani ol i bin givim.

Em i tok dispela i ken strongim tingting bilong ol olsem mani ol i givim, gavman i yusim gut long ol hap we em i mas yusim long em.

Ling-Stuckey i tok gavman i kisim K1.26 bilien long Intenesel Monetari Fan (IMF), narapela K1.5 bilien long Swiss Benk na i bin plen long kisim K500 milien long ol supafan bilong mipela olsem Nambawan Supa na Nasfund tasol bikos long ol lo i stap na banisim wok bilong dispela ol fan, gavman i no bin kisim yet dispela mani.

Ling-Stuckey i tok K600 milien i go long Helt Dipatmen long helpim long daunim hevi bilong sik coronavirus (COVID-19).

Em i givim K200 milien i go long liklik i go long namel sais bisnis (SME) long helpim long ol manmeri i kamapim liklik bisnis bilong ol long dispela taim bilong hevi.

Long dispela em i putim K100 milien long Benk Saut Pasifik (BSP), K100 long Kina Benk na K50 milien long Nesenel Divelopmen Benk.

Ol arapela hap we gavman i givim sapot tu em:

• K113 milen long ol distrik na provins long promotim egrikalsa na fud sekyuriti;
• K50 milien olsem prais sapot program bilong egrikalsa ekspot krop prodaksen bilong ol liklik kopi, kakao na kopra fama;
• K150 milien long ol liklik i go long namel sais bisnis (SME);
• K5 milien long Bisnis Stimulus Pekes we i lukluk long strongim ol bisnis i mas holim yet ol wok manmeri bilong ol; na
• K70 milien long strongim olgeta wok bisnis.