PALAMEN bai kibung gen long neks wik Tunde, 20 Epril.

Namel long ol toktok we bai kamap, em kamap bilong 2021 Nesenel Populesen na Hausing Sensus.

Dispela sensus i mas kamap long las yia tasol dispela i no bin kamap bikos long hevi bilong mani.

Tasol gavman i redi pinis long dispela taim na em i redi long holim sensus.

Bikos long hevi bilong mani, Praim Minista James Marape i bin askim ol lokal Memba na wan wan ol distrik long yusim ol risos bilong ol tu long karimaut dispela sensus.

I gat bilip Papua Niugini nau i gat namel long 8 na 9 milien manmeri.

Dispela namba em gavman bai tokaut stret bihain long 2021 Nesenel Populesen na Hausing Sensus i kamap.

Gavman i bin makim K100 milien long ranim dispela sensus.

Tasol dispela i sot bihain long Nesenel Statistikal Opis (NSO) i bin askim long K190 milien.

Ol las taim we kantri i bin holim ol nesenel sensus em long 1980, 1990, 2000 na 2011.