NU Ailan Provinsal Gavman i no amamas long kain wok Tresera na Memba bilong Kavieng, Ian Ling-Stuckey i mekim.

Deputi Gavana Sammy Missen i tok Ling-Stuckey i no mekim wok bilong em stret.

Em i tok Mista Ling-Stuckey i mas mekim wok bilong em olsem Tresera na i no mekim pilai politik taim em i mekim ol wok i pas long wok bilong mani.

Em i mekim dispela tok long las wik long taim Nu Ailan Provinsal Gavman i bin givim 2021 mani plen (baset) long mun Mas long Ling-Stuckey i glasim na givim tok orait bilong em.

Em i tok tasol inap nau, Ling-Stuckey i no givim wanpela bekim na provinsal gavman i no inap long karimaut ol wok bilong em bihainim baset em i kamapim.

“Stuckey i mas stretim ol hevi tasol em i wok long givim ol hevi,” Missen i tok.

“Em (Ling-Stuckey) i mas stretim dinau bilong kantri, long pawa, long sik coronavirus (COVID-19) na ol bikpela hevi i stap tasol em i lusim na mekim ol disisen we i no stap long mak bilong em long mekim.”

Missen i tok ating het bilong tresera i paul pinis.

Em i tok NIPG i olsem gavman, wok bilong em i pas long laip bilong ol manmeri.

Em i tok taim Ling-Stuckey i no givim tok orait, em i pasim ol wok long i no ken kamap long stretim na strongim laip bilong ol manmeri.

Em i tok Kavieng taun i wok long bungim hevi long pawa planti taim na Mista Ling-Stuckey i no ken kamap na toktok nating long kamapim pawa long sola pawa.

“Nau yet mipela i no lukim wanpela gutpela projek em Tresera i kamapim long strongim laip bilong ol manmeri.

“Ol wok mipela i wok long lukim em bilong mekim pilai politik.”                  

“Mipela i askim Tresera long em i mas givim tok orait bilong Nu Ailan 2021 Provinsal Baset olsem provins i ken go het long ol wok bilong em.”