PLANTI Oposisen Memba bilong Palamen, na Oposisen lida, Belden Namah i no bin kamap long namba wan palamen kibung bilong yia long Tunde.

Pastaim long palamen i sindaun long kibung, dispela pepa i bin bungim mausman bilong Oposisen tasol i no bin inap long kisim toksave olsem kain sindaun bai kamap.

Wan wan memba bilong Oposisen olsem pastaim praim minista na Memba bilong Ialibu-Pangia Peter O’Neill, Sentral Bogenvil memba Sam Akoitai,  Peter Isoiamo (Kairuku-Hiri), Sir Puka Temu (Abau) na Petrus Thomas (Koroba-Kopiago) i bin kamap.

Haus i bin stat wanpela aua leit long 3 klok maski Spika i bin makim 2 klok olsem taim palamen i mas statim kibung.

Deputi Spika na Memba bilong Markham, Koni Iguan i bin go long palamen samba long 19 minit i lusim 2 klok tasol i lukim i no gat inap namba na olsem em i go aut gen na bihain statim kibung taim inap namba bilong ol memba i stap long samba long kibung i ken stat.

Tasol pastaim long dispela, namba wan memba husat i bin stap long samba em Sentral Bogenvil Memba, Mista Akoitai husat i bin stap insait long samba long 10 minit i lusim 2 klok.

Palamen i tok welkam long tupela nupela memba tu long Tunde.

Dispela tupela memba em Peter Tsiamalili Junia bilong Bogenvil Rijinol na Don Polye bilong Kandep (Enga).

Tsiamalili Jnr i kamap bihain long pastaim memba Joe Lera i risain na i bin resis long sia bilong Atonomus Bogenvil Gavman (ABG) presiden sia.

Polye i kamap memba bihain long em i winim Kot ov Disputet Riten bihain long em i go long kot olsem kaun bilong 2017 ileksen i no bin fri na “fair.”

Dispela i lukim kot i givim oda we PNG Elektrol Komisen i mekim rikaun long Kundiawa, Simbu Provins na i lukim namba bilong vot long Polye i winim namba bilong vot bilong pastaim memba, Alfred Manase.