PRAIM Minista James Marape i bin tokaut na opim nupela bilbod bilong Peace na Yuniti Pak wantaim sapot bilong NCD gavman long givim ona long Papa bilong Nesen Gren Sif Sir Michael Thomas Somare long las wik Fonde long Pot Mosbi.

Wok bilong dispela Pak bai wok bai kamap namel long bung bilong ol nesenel gavman na siti wantaim ol famili bilong Sir Michael Somare long bringim bek olgeta histori na wok misin bilong em long bungim olgeta Tok Ples kamap wanpela bikos long bel isi na yuniti pasin.

“Mipela bai surukim wok bilong Sir Michael Somare wantaim konstraksen bikos PNG em Somare na Somare em PNG olsem na dispela Pak bai i gat Laibri, ples we ol PNG bai kam lukim histori bilong Sir Michael Somare na PNG,” Praim Minista James Marape i tok.

Bikpela piksa  na fiutsa bilong dispela Pak em nem bilong Sir Michael Thomas Somare Peace na Yuniti Pak em bilong ol bihain taim jeneresen long kam lukim olgeta stori, veliu na wokabaut bilong em long dispela kantri we em bin senisim tausen nesen long kamap wanpela.

Dispela em bikpela wok long kisim Peace na Yuniti namel long tausen klen na kalsa long kamapim dispela kantri PNG olsem na long tingim olgeta wok bilong em Nesenel Gavman bai wok bung wantaim NCD wantaim konsaltesen bilong ol famili long surukim wok bilong Sir Michael Somare.

Pikinini meri bilong Sir Michael Somare Dulciana Somare Brash i bin makim maus bilong famili na tok bikpela tenkyu long Praim Minista James Marape wantaim NCD Gavana Powes Parkop long kisim dispela taim long kamap wantaim dispela tingting bilong strongim Peace na Yuniti wok we papa i lusim na go.

“Mi laikim mipela i mas joinim han wantaim long givim ona long olgeta papa na mama wantaim husat i bin go pas na hatwok long lukautim na givim ol yet na nau mipela i amamas long hatwok bilong ol,” em i tok.

“Mi ting dispela kain Pak bai bringim olgeta pipel wantaim long spirit bilong yuniti we ol 4-pela papa bilong mipela i bin tokaut klia,” em i tok.

Jacklyn Kimala i raitim